បារាំងកត់ត្រាអ្នកស្លាប់ប្រមាណ ១,០០០នាក់ ពាក់ព័ន្ធនឹងរលកកម្ដៅ ខណៈមនុស្សវ័យចំណាស់រងផលប៉ះពាល់ខ្លាំង

បារាំងកត់ត្រាអ្នកស្លាប់ប្រមាណ ១,០០០នាក់ ពាក់ព័ន្ធនឹងរលកកម្ដៅ ខណៈមនុស្សវ័យចំណាស់រងផលប៉ះពាល់ខ្លាំង

ប៉ារីស៖ អាជ្ញាធរសុខាភិបាលបារាំង បានឱ្យដឹងនៅថ្ងៃទី២៨ ខែមិថុនា ឆ្នាំ២០២៦ ថា មានមនុស្សប្រមាណ ១,០០០នាក់ បានស្លាប់ពាក់ព័ន្ធនឹងរលកកម្ដៅ ដែលបានវាយប្រហារប្រទេសបារាំង និងតំបន់អឺរ៉ុបខាងលិចក្នុងរយៈពេលប៉ុន្មានថ្ងៃកន្លងមក។ តួលេខនេះត្រូវបានចាត់ទុកថា ខ្ពស់ជាងការរំពឹងទុក និងនៅជាតួលេខបឋម ដែលអាចនឹងកើនឡើងបន្ថែម។ នេះបើតាមការចេញផ្សាយរបស់ទីភ្នាក់ងារសារព័ត៌មាន AFP។

យោងតាមសេចក្ដីថ្លែងការណ៍របស់ទីភ្នាក់ងារសុខាភិបាលសាធារណៈបារាំង ចាប់តាំងពីថ្ងៃទី២៤ ខែមិថុនា មក ការកើនឡើងនៃចំនួនអ្នកស្លាប់ប្រមាណ ១,០០០នាក់ ត្រូវបានកត់សម្គាល់បើប្រៀបធៀបនឹងអត្រាមរណភាពក្នុងខែមុនៗ។ ក្នុងចំណោមអ្នកស្លាប់ទាំងនោះ ប្រមាណ ៨៥ភាគរយ មានអាយុលើសពី ៦៥ឆ្នាំ ខណៈតំបន់ដែលស្ថិតក្រោមការប្រកាសអាសន្នពណ៌ក្រហមសម្រាប់រលកកម្ដៅ គឺជាតំបន់ដែលរងផលប៉ះពាល់ធ្ងន់ធ្ងរបំផុត។

អាជ្ញាធរសុខាភិបាលបានបញ្ជាក់ថា ការកើនឡើងនៃអត្រាមរណភាព ភាគច្រើនពាក់ព័ន្ធនឹងអ្នកដែលបានស្លាប់នៅក្នុងលំនៅឋានរបស់ខ្លួន ជាពិសេសនៅតំបន់ អ៊ីល ដឺ ហ្វ្រង់ (Île-de-France) ដែលរួមមានទីក្រុងប៉ារីស និងតំបន់ជាយរដ្ឋធានី។ ករណីនេះបានបង្ហាញពីសារៈសំខាន់នៃការពង្រឹងវិធានការជួយគាំទ្រប្រជាពលរដ្ឋដែលងាយរងគ្រោះ ជាពិសេសមនុស្សវ័យចំណាស់ និងអ្នកដែលរស់នៅតែម្នាក់ឯង ឬកំពុងប្រឈមនឹងភាពឯកោ។

បើទោះបីជាស្ថានភាពរលកកម្ដៅបានធូរស្រាលបន្តិចនៅទូទាំងប្រទេសបារាំងកាលពីថ្ងៃអាទិត្យក៏ដោយ ក៏អាជ្ញាធរបានបន្តអំពាវនាវឱ្យប្រជាពលរដ្ឋរក្សាការប្រុងប្រយ័ត្ន ខណៈក្នុងប៉ុន្មានថ្ងៃកន្លងមក សីតុណ្ហភាពនៅតំបន់មួយចំនួនបានកើនលើស ៤០អង្សាសេ។ មន្ត្រីជំនាញក៏បានព្រមានដែរថា តួលេខអ្នកស្លាប់ដែលបានប្រកាសនាពេលនេះ គ្រាន់តែជាការប៉ាន់ប្រមាណបឋមប៉ុណ្ណោះ ហើយអាចនឹងមានការកែសម្រួលនៅពេលមានទិន្នន័យផ្លូវការបន្ថែម៕

ប្រភព៖ The Jarkata Post

https://www.thejakartapost.com/world/2026/06/28/france-records-around-1000-excess-deaths-in-heatwave

France24

https://www.france24.com/en/europe/20260628-france-records-around-1-000-excess-deaths-during-heatwave

រាយការណ៍ដោយ៖ The Khmer Today