ជំហានថ្មីដោះស្រាយការលិចទឹកនៅភ្នំពេញ! ប្រឡាយបេតុងជាង១,៧០០ម៉ែត្រ នៅខណ្ឌមានជ័យជិតរួចរាល់

ជំហានថ្មីដោះស្រាយការលិចទឹកនៅភ្នំពេញ! ប្រឡាយបេតុងជាង១,៧០០ម៉ែត្រ នៅខណ្ឌមានជ័យជិតរួចរាល់

ភ្នំពេញ៖ ជំហានថ្មីមួយក្នុងការកែលម្អប្រព័ន្ធរំដោះទឹកនៅរាជធានីភ្នំពេញ កំពុងត្រូវបានអនុវត្ត ខណៈគម្រោងសាងសង់ប្រឡាយបេតុងប្រវែងជាង ១,៧០០ម៉ែត្រ នៅខណ្ឌមានជ័យ សម្រេចការងារបានប្រមាណ ៩០ភាគរយហើយ គិតត្រឹមថ្ងៃទី៧ ខែកក្កដា ឆ្នាំ២០២៦។

គម្រោងនេះមានគោលបំណងពង្រឹងសមត្ថភាពប្រព័ន្ធរំដោះទឹក និងកាត់បន្ថយហានិភ័យនៃការជន់លិចនៅតំបន់មួយចំនួនក្នុងរាជធានីភ្នំពេញ ជាពិសេសតំបន់ដែលធ្លាប់ប្រឈមបញ្ហាទឹកជំនន់ក្នុងរដូវវស្សា។

តាមព័ត៌មានពីការដ្ឋាន គម្រោងប្រឡាយបេតុងនេះ ស្ថិតនៅក្នុងភូមិសាស្ត្រសង្កាត់ចាក់អង្រែលើ ខណ្ឌមានជ័យ ដោយមានទទឹងប្រឡាយ ២០ម៉ែត្រ និងប្រវែងសរុបជាង ១,៧០០ម៉ែត្រ។ ក្នុងដំណើរការសាងសង់ ក្រុមការងារបានបុកស៊ីផាយបេតុងចំនួន ៣,១១១ដើម ចូលក្នុងដីដែលមានជម្រៅពី ១០ម៉ែត្រ ដល់១២ម៉ែត្រ ដើម្បីពង្រឹងភាពរឹងមាំនៃរចនាសម្ព័ន្ធប្រឡាយ និងធានាភាពធន់នាពេលវែង។

គម្រោងនេះត្រូវបានអនុវត្តដោយមន្ទីរសាធារណការ និងដឹកជញ្ជូនរាជធានីភ្នំពេញ ក្នុងនាមជាសេនាធិការរបស់រដ្ឋបាលរាជធានីភ្នំពេញ ដោយសហការជាមួយក្រុមហ៊ុនជំនាញ ដើម្បីធានាថាការងារសាងសង់ប្រកបដោយគុណភាព និងស្របតាមស្តង់ដារបច្ចេកទេស។

ក្រោយបញ្ចប់ ប្រឡាយបេតុងថ្មីនេះ នឹងមានតួនាទីសំខាន់ក្នុងការទទួល និងរំដោះទឹកចេញពីស្ថានីយបូមទឹកបឹងត្របែក ឆ្លងកាត់តំបន់ស្ពានមហាឧបាសិកា ហ៊ុន នាង និងបន្តបង្ហូរទៅកាន់តំបន់ប្រព្រឹត្តិកម្មទឹកស្អាតបឹងទំពន់ ដែលជាផ្នែកមួយនៃប្រព័ន្ធគ្រប់គ្រងទឹករបស់រាជធានីភ្នំពេញ។

អាជ្ញាធរបានបញ្ជាក់ថា ការដ្ឋានកំពុងបន្តដំណើរការទៅតាមផែនការ ដោយផ្តោតសំខាន់លើគុណភាពសំណង់ សុវត្ថិភាពការងារ និងប្រសិទ្ធភាពប្រើប្រាស់រយៈពេលវែង។

គម្រោងនេះត្រូវបានរំពឹងថា នឹងក្លាយជាផ្នែកសំខាន់មួយក្នុងការលើកកម្ពស់សមត្ថភាពរំដោះទឹករបស់រាជធានីភ្នំពេញ ជួយកាត់បន្ថយផលប៉ះពាល់ពីការលិចទឹក និងបង្កើនភាពធន់របស់ទីក្រុងចំពោះបញ្ហាទឹកជំនន់នៅពេលអនាគត។

ប្រភព:មន្ទីរព័ត៌មានរាជធានីភ្នំពេញ

https://phnompenh.info.gov.kh/km/article/019f3b4c-b52a-7000-a03c-bfb65201af59

រាយការណ៍ដោយ ៖ The Khmer Today