មជ្ឈមណ្ឌលបុប្ផាណា នឹងចាក់បញ្ចាំងភាពយន្តឯកសារ «ជីវិតនិងការស្លាប់នៅព្រះវិហារ» ចូលរួម​ទស្សនា​ដោយឥតគិតថ្លៃ

មជ្ឈមណ្ឌលបុប្ផាណា នឹងចាក់បញ្ចាំងភាពយន្តឯកសារ «ជីវិតនិងការស្លាប់នៅព្រះវិហារ» ចូលរួម​ទស្សនា​ដោយឥតគិតថ្លៃ

ភ្នំពេញ៖ មជ្ឈមណ្ឌលបុប្ផាណា នឹងរៀបចំកម្មវិធី Cine-Saturday នៅថ្ងៃសៅរ៍ ទី១១ ខែកក្កដា ឆ្នាំ២០២៦ ដោយចាក់បញ្ចាំងភាពយន្តឯកសារ «ជីវិតនិងការស្លាប់នៅព្រះវិហារ» (Life and Death at Preah Vihear) ដែលដឹកនាំដោយ លោក​ David A. Feingold (លោក​ ដេវីដ អេ. ហ្វីងហ្គោល) ផលិតក្នុងឆ្នាំ២០១៤ មានរយៈពេល ៥១ នាទី និងប្រើប្រាស់ភាសាអង់គ្លេស។

ខ្សែភាពយន្តឯកសារនេះ ផ្តោតលើជម្លោះដ៏ស្មុគស្មាញរវាងកម្ពុជា និងថៃ ពាក់ព័ន្ធនឹងប្រាសាទព្រះវិហារ ដោយស្វែងយល់ពីប្រវត្តិនៃការកំណត់ព្រំដែនក្នុងសម័យអាណានិគម និងការអះអាងប្រវត្តិសាស្ត្រខុសគ្នារវាងប្រទេសទាំងពីរ។ ការថតអស់រយៈពេលប្រាំឆ្នាំនៅកម្ពុជា និងថៃ បានបង្ហាញពីការវិវត្តនៃជម្លោះជុំវិញតំបន់ប្រាសាទនេះ។

ក្រៅពីបញ្ហាព្រំដែន ភាពយន្តក៏បង្ហាញពីរបៀបដែលប្រាសាទហិណ្ឌូសតវត្សទី១១ បានក្លាយជាចំណុចកណ្ដាលនៃភាពតានតឹងផ្នែកនយោបាយ និងវប្បធម៌ក្នុងសម័យទំនើប។ ទន្ទឹមនឹងនេះ វាក៏ឆ្លុះបញ្ចាំងពីឥទ្ធិពលនៃការបែងចែកព្រំដែនក្នុងសម័យអាណានិគម ដែលបានបន្តជះឥទ្ធិពលដល់ទំនាក់ទំនងក្នុងតំបន់អាស៊ីអាគ្នេយ៍។

ស្នាដៃឯកសារនេះ ក៏លើកយកបញ្ហាការបែងចែកនយោបាយផ្ទៃក្នុងប្រទេសថៃ និងផ្តល់ទស្សនៈអំពីជាតិភាវូបនីយកម្ម អត្តសញ្ញាណជាតិ និងតួនាទីរបស់ប្រវត្តិសាស្ត្រ ក្នុងការបង្កើត និងបន្តឥទ្ធិពលលើជម្លោះសម័យបច្ចុប្បន្ន។

កម្មវិធីចាក់បញ្ចាំងនឹងប្រព្រឹត្តទៅនៅថ្ងៃសៅរ៍ ទី១១ ខែកក្កដា ឆ្នាំ២០២៦ វេលាម៉ោង ៥:០០ ល្ងាច នៅមជ្ឈមណ្ឌលបុប្ផាណា។ សាធារណជនអាចចូលរួមទស្សនាដោយសេរី និងឥតគិតថ្លៃ។

ប្រភពពី៖​ មជ្ឈមណ្ឌល​បុប្ផាណា​ Bophana Center

https://www.facebook.com/share/p/1D8aq9x5V4/?mibextid=wwXIfr

រាយការណ៍​ដោយ​៖ The Khmer Today