កម្ពុជា ត្រូវបានជ្រើសរើសជាប្រទេសកិត្តិយស ក្នុងមហោស្រពភាពយន្តនិយាយភាសាបារាំង លើកទី១៩ នៅប្រទេសបារាំង

កម្ពុជា ត្រូវបានជ្រើសរើសជាប្រទេសកិត្តិយស ក្នុងមហោស្រពភាពយន្តនិយាយភាសាបារាំង លើកទី១៩ នៅប្រទេសបារាំង

កម្ពុជាត្រូវបានជ្រើសរើសជាប្រទេសកិត្តិយស សម្រាប់ មហោស្រពភាពយន្តនិយាយភាសាបារាំង លើកទី១៩ ដែលនឹងប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៩ ខែសីហា ឆ្នាំ២០២៦ នៅទីក្រុង Angoulême ប្រទេសបារាំង។

ការប្រកាសនេះ ត្រូវបានធ្វើឡើងក្នុងសន្និសីទសារព័ត៌មានដែលរៀបចំដោយ ស្ថានទូតកម្ពុជាប្រចាំប្រទេសបារាំង សហការជាមួយក្រុមការងារមហោស្រព កាលពីថ្ងៃទី៩ ខែកក្កដា ឆ្នាំ២០២៦ នៅនិវេសនដ្ឋាន Charles Floquet ដើម្បីបង្ហាញពីតួនាទី និងសក្តានុពលរបស់វិស័យភាពយន្តកម្ពុជា។

ឯកឧត្តម លុយ ដាវីត ឯកអគ្គរាជទូតកម្ពុជាប្រចាំសាធារណរដ្ឋបារាំង បានមានប្រសាសន៍ថា កម្ពុជាមានមោទនភាពយ៉ាងខ្លាំងចំពោះការទទួលបានកិត្តិយសនេះ ដែលជាការទទួលស្គាល់ពីទំនាក់ទំនងប្រវត្តិសាស្ត្ររវាងកម្ពុជា និងសហគមន៍ហ្វ្រង់កូហ្វូនី។

ឯកឧត្តមបានបញ្ជាក់ថា ការជ្រើសរើសកម្ពុជាជាប្រទេសកិត្តិយស ក៏មានសារៈសំខាន់ក្នុងបរិបទដែលកម្ពុជានឹងធ្វើជាម្ចាស់ផ្ទះនៃ កិច្ចប្រជុំកំពូលអង្គការហ្វ្រង់កូហ្វូនី លើកទី២០ នៅរាជធានីភ្នំពេញ នាថ្ងៃទី១៥ និងទី១៦ ខែវិច្ឆិកា ឆ្នាំ២០២៦។

ព្រឹត្តិការណ៍នេះ ក៏ជាឱកាសដើម្បីលើកតម្កើងកេរដំណែលរបស់ ព្រះករុណា ព្រះបរមរតនកោដ្ឋ នរោត្តម សីហនុ ដែលជាឥស្សរជនដ៏សំខាន់មួយរូបក្នុងប្រវត្តិសាស្ត្រភាពយន្តកម្ពុជា និងជាអ្នកចូលរួមចំណែកក្នុងការលើកកម្ពស់វប្បធម៌ខ្មែរតាមរយៈភាពយន្ត។

ក្នុងសន្និសីទនេះ ឯកឧត្តមក៏បានរំលឹកពីប្រវត្តិសាស្ត្រភាពយន្តកម្ពុជា ចាប់ពី យុគសម័យមាសក្នុងទសវត្សរ៍ឆ្នាំ១៩៦០ រហូតដល់ការបាត់បង់ដ៏ធ្ងន់ធ្ងរក្រោមរបបខ្មែរក្រហម និងការខិតខំស្តារឡើងវិញដោយអ្នកផលិតភាពយន្តជំនាន់ថ្មី។

ការចូលរួមជាប្រទេសកិត្តិយសនៅមហោស្រពភាពយន្តនិយាយភាសាបារាំងនេះ ត្រូវបានចាត់ទុកថា ជាឱកាសដ៏សំខាន់សម្រាប់ផ្សព្វផ្សាយវប្បធម៌ អត្តសញ្ញាណជាតិ និងលើកកម្ពស់វិស័យភាពយន្តកម្ពុជាទៅកាន់ឆាកអន្តរជាតិ។

ប្រភពពី៖

ឯកឧត្តម លុយ ដាវីត

- https://www.facebook.com/share/p/17pqAkibzK/

ក្រសួងព័ត៌មាន

- https://www.facebook.com/share/p/1CnpX1z8ta/

រាយការណ៍ដោយ៖ The Khmer Today