អ្នកគាំទ្រ BTS ១០៥ នាក់ខាតលុយ ១,៨ លានបាត ក្រោយទិញសំបុត្រក្លែងក្លាយ នៅប្រទេសថៃ

អ្នកគាំទ្រ BTS ១០៥ នាក់ខាតលុយ ១,៨ លានបាត ក្រោយទិញសំបុត្រក្លែងក្លាយ នៅប្រទេសថៃ

បាងកក ប្រទេសថៃ — ប៉ូលិសថៃបានបង្ក្រាបបណ្ដាញឆបោកលក់សំបុត្រប្រគំតន្ត្រីរបស់ក្រុមចម្រៀងកូរ៉េខាងត្បូង BTS ដោយចាប់ខ្លួនជនសង្ស័យចំនួន ៥ នាក់ ដែលត្រូវបានចោទថាបានបោកប្រាស់អ្នកគាំទ្រ BTS ចំនួន ១០៥ នាក់ ឱ្យខាតបង់ប្រាក់ប្រមាណ ១,៨ លានបាត តាមរយៈការលក់សំបុត្រក្លែងក្លាយ។

ជនសង្ស័យទាំង ៥ នាក់ មានអាយុចន្លោះពី ១៨ ដល់ ២៧ ឆ្នាំ ត្រូវបានចាប់ខ្លួនតាមដីកាតុលាការព្រហ្មទណ្ឌ Min Buri ចេញនៅថ្ងៃទី១០ ខែកក្កដា ឆ្នាំ២០២៦ នៅទីក្រុងបាងកក និងខេត្ត Surat Thani។ ពួកគេត្រូវបានបញ្ជូនទៅស៊ើបអង្កេតបន្តដោយផ្នែកប៉ូលិសការពារអ្នកប្រើប្រាស់នាថ្ងៃទី១១ ខែកក្កដា ឆ្នាំ២០២៦ ។

ជនសង្ស័យប្រឈមនឹងបទចោទ រួមមាន ឆបោកសាធារណៈ បញ្ចូលព័ត៌មានមិនពិតក្នុងប្រព័ន្ធកុំព្យូទ័រ ដែលអាចបង្កការខូចខាតដល់សាធារណជន និងការបើក ឬអនុញ្ញាតឱ្យប្រើប្រាស់គណនីធនាគារ និងប្រព័ន្ធទូទាត់អេឡិចត្រូនិកសម្រាប់សកម្មភាពឧក្រិដ្ឋកម្ម។

ករណីនេះកើតឡើងក្រោយអ្នកគាំទ្រ BTS ជាច្រើនបានរាយការណ៍ថា ត្រូវបានបោកប្រាស់ បន្ទាប់ពីក្រុមចម្រៀងល្បីលំដាប់ពិភពលោកនេះប្រកាសដំណើរប្រគំតន្ត្រីនៅប្រទេសថៃ។ ដោយសារតម្រូវការសំបុត្រខ្ពស់ អ្នកគាំទ្រមួយចំនួនបានប្រើសេវាកក់សំបុត្រពីភាគីទីបី ដែលមានគណនីបណ្ដាញសង្គមក្លែងក្លាយផ្សព្វផ្សាយលក់សំបុត្រតម្លៃទាក់ទាញ។

ប៉ូលិសបានឱ្យដឹងថា ជនរងគ្រោះចំនួន ១០៥ នាក់ បានដាក់ពាក្យបណ្ដឹងទៅផ្នែកប៉ូលិសការពារអ្នកប្រើប្រាស់ ដោយម្នាក់ៗខាតបង់ជាមធ្យមប្រមាណ ១៧,៧០០ បាត។ ការស៊ើបអង្កេតបានរកឃើញថា ការឆបោកនេះត្រូវបានរៀបចំឡើងដោយបណ្ដាញតែមួយ ដែលនាំឱ្យអាជ្ញាធរទទួលបានភស្តុតាង និងសុំដីកាចាប់ខ្លួនជនសង្ស័យទាំង ៥ នាក់។

ក្នុងការសាកសួរ ជនសង្ស័យមួយចំនួនអះអាងថា ពួកគេត្រូវបានជ្រើសរើសតាមក្រុមស្វែងរកការងារតាមអ៊ីនធឺណិត ដើម្បីទទួល និងផ្ទេរប្រាក់តាម TrueMoney ដោយគិតថាជាការទូទាត់ការបញ្ជាទិញជាមុន។ ចំណែកជនសង្ស័យម្នាក់ទៀត ត្រូវបានចោទថាជាអ្នកបង្កើតទំព័រក្លែងក្លាយ និងគណនី X សម្រាប់បោកប្រាស់ ហើយបានសារភាពថាទទួលប្រាក់ប្រមាណ ៨០០,០០០ បាត មុនចំណាយលើការធ្វើដំណើរក្រៅប្រទេស និងទំនិញប្រណិត។

ប្រភពពី​៖

— Khaosod English:

https://www.facebook.com/share/p/18twq99iEg/

https://www.khaosodenglish.com/.../five-arrested-over.../ (https://www.khaosodenglish.com/news/crimecourtscalamity/2026/07/13/five-arrested-over-bts-concert-ticket-scam-worth-1-8-million-baht/?fbclid=IwZXh0bgNhZW0CMTAAYnJpZBExREhLcVlPSlpKaUJ4dGhQc3NydGMGYXBwX2lkEDIyMjAzOTE3ODgyMDA4OTIAAR4OkV4Jd0kkkv3CzglNKp6CV2fPz6_24u1VMV6NzY5tQHD6UMEqU3iXM4NdRw_aem_dJJi4Zljc_U_xLSuywBwng)

រាយការណ៍ដោយ៖ The Khmer Today