ព្រះសីហនុត្រៀមទទួលរោងចក្រថ្មី ៤ បន្ថែមទៀត! បើកឱកាសថ្មីសម្រាប់វិស័យឧស្សាហកម្ម

ព្រះសីហនុត្រៀមទទួលរោងចក្រថ្មី ៤ បន្ថែមទៀត! បើកឱកាសថ្មីសម្រាប់វិស័យឧស្សាហកម្ម

ព្រះសីហនុ៖ ខេត្តព្រះសីហនុ កំពុងត្រៀមទទួលគម្រោងរោងចក្រថ្មីចំនួន ៤ បន្ថែមទៀត បន្ទាប់ពីអនុគណៈកម្មាធិការវិនិយោគខេត្ត បានលើកយកគម្រោងទាំងនេះមកពិនិត្យ និងអនុម័ត។ ប្រសិនបើទទួលបានការអនុញ្ញាតជាផ្លូវការ គម្រោងទាំងនេះនឹងក្លាយជាកម្លាំងជំរុញថ្មីសម្រាប់ការអភិវឌ្ឍវិស័យឧស្សាហកម្ម ការទាក់ទាញវិនិយោគ និងការពង្រីកមូលដ្ឋានផលិតកម្មនៅកម្ពុជា។

កិច្ចប្រជុំពិនិត្យគម្រោងនេះ បានធ្វើឡើងនៅរសៀលថ្ងៃទី១៦ ខែកក្កដា ឆ្នាំ២០២៦ ក្រោមអធិបតីភាព ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ និងជាប្រធានអនុគណៈកម្មាធិការវិនិយោគខេត្ត ដោយផ្តោតលើការពិនិត្យសំណើវិនិយោគ និងសំណើនាំចូលសម្ភារសម្រាប់គម្រោងរោងចក្រចំនួន ៤។

គម្រោងទាំងនោះរួមមាន រោងចក្រផលិតឧបករណ៍ជាងគ្រប់ប្រភេទ, រោងចក្រកែច្នៃលោហធាតុ ដែក និងប្លាស្ទិក, រោងចក្របោះពុម្ពខ្នាតធំលើក្រដាស និងប្លាស្ទិក និង រោងចក្រផលិតផ្ទាំងក្រណាត់គំនូរ ស៊ុមគំនូរ ជើងទ្រគំនូរ គ្រឿងសង្ហារិម និងផលិតផលកែច្នៃពីឈើ។ គម្រោងទាំងនេះ ត្រូវបានស្នើឡើងដោយក្រុមហ៊ុន GOLDENLINKPRO (CAMBODIA) HARDWARE MANUFACTURING CO., LTD, D.B.GOLD IMPORT & EXPORT CO., LTD, ZHENCHENG WEILAI TECHNOLOGY (CAMBODIA) CO., LTD និង YIYUAN HONGDA TIMBER (CAMBODIA) CO., LTD ដែលគ្រោងបណ្តាក់ទុននៅក្រុងកំពង់សោម និងស្រុកព្រៃនប់។

ការលេចចេញនូវគម្រោងថ្មីទាំងនេះ ឆ្លុះបញ្ចាំងពីការបន្តកើនឡើងនៃការចាប់អារម្មណ៍របស់វិនិយោគិនបរទេសចំពោះខេត្តព្រះសីហនុ ដែលកំពុងវិវត្តជាបណ្តុំឧស្សាហកម្ម និងភស្តុភារដ៏សំខាន់របស់កម្ពុជា។ ប្រសិនបើគម្រោងទាំងនេះដំណើរការតាមផែនការ វានឹងជួយពង្រីកខ្សែច្រវាក់ផលិតកម្ម បង្កើនសមត្ថភាពផលិត ទាក់ទាញទុនវិនិយោគថ្មី បង្កើតការងារ និងលើកកម្ពស់ការនាំចេញផលិតផល «ផលិតនៅកម្ពុជា» ទៅកាន់ទីផ្សារអន្តរជាតិ។

ទោះជាយ៉ាងណា គម្រោងទាំង ៤ នៅស្ថិតក្នុងដំណាក់កាលពិនិត្យ និងអនុម័តតាមនីតិវិធីរបស់អនុគណៈកម្មាធិការវិនិយោគខេត្ត។ ក៏ប៉ុន្តែ នេះជាសញ្ញាវិជ្ជមានមួយ ដែលបង្ហាញពីសក្ដានុពលរបស់ខេត្តព្រះសីហនុក្នុងការទាក់ទាញវិនិយោគ និងបើកឱកាសថ្មីៗសម្រាប់ការអភិវឌ្ឍវិស័យឧស្សាហកម្មរបស់កម្ពុជា។

ប្រភព៖ រដ្ឋបាលខេត្តព្រះសីហនុ

https://web.facebook.com/share/p/14kWkNyEygu/

រាយការណ៍ដោយ៖ The Khmer Today