សង្គ្រាមជាមួយអ៊ីរ៉ង់ធ្វើឱ្យអាមេរិកចំណាយជាង ៣៧.៥ពាន់លានដុល្លារ ខណៈរដ្ឋមន្ត្រីការពារជាតិស្នើថវិកាបន្ថែម

សង្គ្រាមជាមួយអ៊ីរ៉ង់ធ្វើឱ្យអាមេរិកចំណាយជាង ៣៧.៥ពាន់លានដុល្លារ ខណៈរដ្ឋមន្ត្រីការពារជាតិស្នើថវិកាបន្ថែម

វ៉ាស៊ីនតោន៖ សង្គ្រាមរវាងសហរដ្ឋអាមេរិក និងអ៊ីរ៉ង់ បានធ្វើឱ្យរដ្ឋាភិបាលអាមេរិកចំណាយថវិកាយោធាសរុបប្រមាណ ៣៧.៥ពាន់លានដុល្លារ គិតមកទល់ពេលនេះ។ ស្របពេលជាមួយគ្នា រដ្ឋមន្ត្រីការពារជាតិអាមេរិក លោក Pete Hegseth បានអំពាវនាវឱ្យសភាអនុម័តកញ្ចប់ថវិកាបន្ថែម ៨៧ពាន់លានដុល្លារ ដើម្បីទ្រទ្រង់ប្រតិបត្តិការយោធា និងពង្រឹងសមត្ថភាពការពារជាតិ។

ថ្លែងក្នុងសវនាការនៃគណៈកម្មាធិការថវិកាព្រឹទ្ធសភា លោក Hegseth បានបញ្ជាក់ថា ចំណាយសម្រាប់សង្គ្រាមបានកើនឡើងជិត ៨ពាន់លានដុល្លារ បើធៀបនឹងការប៉ាន់ប្រមាណកាលពីខែឧសភា។ ក្នុងចំណោមថវិកាបន្ថែមដែលបានស្នើនោះ មាន ៦៧ពាន់លានដុល្លារ នឹងត្រូវប្រើប្រាស់សម្រាប់ប្រតិបត្តិការយោធារបស់អាមេរិកនៅតំបន់មជ្ឈិមបូព៌ា។

លោក Hegseth បានអះអាងថា ការផ្តល់ថវិកាបន្ថែមមានសារៈសំខាន់ ដើម្បីធានាថា កងទ័ពអាមេរិកអាចបន្តបើកប្រាក់បៀវត្សរ៍ដល់កងកម្លាំង បំពេញបន្ថែមអាវុធ និងគ្រាប់រំសេវ ព្រមទាំងរក្សាប្រតិបត្តិការយោធាឱ្យដំណើរការដោយមិនមានការរំខាន។ លោកក៏បានលើកឡើងថា ពិភពលោកកំពុងស្ថិតក្នុងបរិយាកាសសន្តិសុខដ៏គ្រោះថ្នាក់ ដែលទាមទារឱ្យអាមេរិកបន្តពង្រឹងសមត្ថភាពយោធារបស់ខ្លួន។

ទោះជាយ៉ាងណា សំណើថវិកានេះបានប្រឈមនឹងការរិះគន់ពីសមាជិកគណបក្សប្រជាធិបតេយ្យមួយចំនួន ដែលចាត់ទុកថា រដ្ឋបាលអាមេរិកកំពុងស្នើថវិកាយ៉ាងច្រើនសម្រាប់សង្គ្រាម ខណៈប្រជាពលរដ្ឋជាច្រើននៅតែជួបការលំបាកផ្នែកជីវភាព។ ប្រភពមួយចំនួនក៏បានអះអាងដែរថា តួលេខ ៣៧.៥ពាន់លានដុល្លារ អាចនៅទាបជាងការចំណាយពិតប្រាកដ ព្រោះមិនទាន់រាប់បញ្ចូលថ្លៃជួសជុលមូលដ្ឋានទ័ព និងហេដ្ឋារចនាសម្ព័ន្ធដែលរងការខូចខាត។

ការប្រយុទ្ធរវាងសហរដ្ឋអាមេរិក និងអ៊ីរ៉ង់បានផ្ទុះឡើងសារជាថ្មី បន្ទាប់ពីបទឈប់បាញ់ដែលភាគីទាំងពីរបានព្រមព្រៀងគ្នាកាលពីខែមេសា ត្រូវបានបរាជ័យ។ ខណៈការវាយប្រហារទៅវិញទៅមកនៅតែបន្ត សំណើថវិកាបន្ថែមរបស់ក្រសួងការពារជាតិ ត្រូវបានគេមើលឃើញថា នឹងក្លាយជាប្រធានបទដ៏ចម្រូងចម្រាសមួយនៅក្នុងសភាអាមេរិក នាពេលខាងមុខ។

ប្រភព៖ BBC

https://www.bbc.com/news/articles/c70gek2kqyno

រាយការណ៍ដោយ៖ The Khmer Today