ចិនអំពាវនាវឱ្យថៃ-កម្ពុជា ដោះស្រាយជម្លោះដោយសន្តិវិធី ខណៈកម្ពុជាប្រាប់ថៃឱ្យ"ឈប់បង្កើតលេស" ពន្យារពេលកំណត់ព្រំដែន

ចិនអំពាវនាវឱ្យថៃ-កម្ពុជា ដោះស្រាយជម្លោះដោយសន្តិវិធី ខណៈកម្ពុជាប្រាប់ថៃឱ្យ"ឈប់បង្កើតលេស" ពន្យារពេលកំណត់ព្រំដែន

ភ្នំពេញ/ប៉េកាំង៖ ប្រធានាធិបតីចិនឯកឧត្តម ស៊ី ជីនពីង (Xi Jinping) បានអំពាវនាវឱ្យប្រទេសថៃ និងកម្ពុជា បន្តដោះស្រាយជម្លោះព្រំដែនតាមរយៈការសន្ទនា និងការពិគ្រោះយោបល់ដោយសន្តិវិធី ដោយបញ្ជាក់ថា ការដោះស្រាយវិវាទប្រកបដោយសន្តិវិធី គឺស្របទៅនឹងផលប្រយោជន៍រួម និងផលប្រយោជន៍រយៈពេលវែងរបស់ប្រជាជនទាំងពីរប្រទេស។ ការលើកឡើងនេះ ធ្វើឡើងក្នុងជំនួបរវាងលោក ស៊ី ជីនពីង និងលោក អានុទីន ឆានវីរៈគុល (Anutin Charnvirakul) នាយករដ្ឋមន្ត្រីថៃ ដោយលោកក៏បានបញ្ជាក់ថា ចិនត្រៀមបន្តដើរតួនាទីប្រកបដោយភាពស្ថាបនា ដើម្បីគាំទ្រកិច្ចសន្ទនា និងការរក្សាសន្តិភាពក្នុងតំបន់។

ការអំពាវនាវរបស់ប្រធានាធិបតីចិន ធ្វើឡើងស្របពេលដែលក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីថ្លែងការណ៍បដិសេធយ៉ាងម៉ឺងម៉ាត់ ចំពោះការលើកឡើងរបស់រដ្ឋមន្ត្រីការបរទេសថៃ ដែលអះអាងថា ការដែលកម្ពុជាចាប់ផ្តើមនីតិវិធីដោះស្រាយវិវាទសមុទ្រក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) បានបិទផ្លូវចំពោះការចរចាព្រំដែនគោក។ កម្ពុជាបានចាត់ទុកការលើកឡើងនេះថា មិនត្រឹមត្រូវ និងបានអំពាវនាវឱ្យភាគីថៃ «ឈប់បង្កើតលេស» ដើម្បីពន្យារពេលការងារកំណត់ខណ្ឌសីមាព្រំដែនគោក។

កម្ពុជាបានបញ្ជាក់ថា វិវាទព្រំដែនសមុទ្រ និងព្រំដែនគោក គឺស្ថិតក្រោមក្របខ័ណ្ឌច្បាប់ និងយន្តការដោះស្រាយផ្សេងពីគ្នា ដូច្នេះការប្រើប្រាស់យន្តការក្រោម UNCLOS លើវិវាទសមុទ្រ មិនអាចយកមកធ្វើជាហេតុផលសម្រាប់ផ្អាក ឬពន្យារពេលការងាររបស់គណៈកម្មាធិការចម្រុះខណ្ឌសីមាព្រំដែនគោក (JBC) បានឡើយ។ កម្ពុជាក៏បានអំពាវនាវឱ្យថៃវិលត្រឡប់មកបន្តការងាររបស់ JBC ដោយសុច្ចរិត ស្របតាមអនុស្សរណៈនៃការយោគយល់គ្នា (MoU) ឆ្នាំ២០០០ និងបទបញ្ជាប្រតិបត្តិដែលភាគីទាំងពីរបានឯកភាពគ្នា។

ជាមួយគ្នានេះ កម្ពុជាបានរំលឹកថា សហគមន៍អន្តរជាតិបានបន្តគាំទ្រការដោះស្រាយជម្លោះដោយសន្តិវិធី និងគោរពច្បាប់អន្តរជាតិ រួមទាំងការអនុវត្តសាលក្រមរបស់តុលាការយុត្តិធម៌អន្តរជាតិ (ICJ) ពាក់ព័ន្ធនឹងប្រាសាទព្រះវិហារ។ ទន្ទឹមនឹងការអំពាវនាវរបស់ចិនឱ្យភាគីទាំងពីររកដំណោះស្រាយតាមការសន្ទនា កម្ពុជាបានអះអាងថា ខ្លួននៅតែប្តេជ្ញាដោះស្រាយបញ្ហាព្រំដែនដោយសន្តិវិធី ប៉ុន្តែទាមទារឱ្យភាគីថៃបញ្ឈប់ការបង្កើតហេតុផលពន្យារពេល និងបង្ហាញឆន្ទៈពិតប្រាកដក្នុងការអនុវត្តកាតព្វកិច្ចស្របតាមច្បាប់អន្តរជាតិ។

ប្រភព៖ Wang Wenbin Chinese Ambassador to the Kingdom of Cambodia

https://www.facebook.com/share/p/14gfaK7ayMv/?mibextid=wwXIfr

ប្រភព៖ក្រសួងការបរទេស

https://www.facebook.com/share/p/14c3k8RU3YC/

រាយការណ៍ដោយ៖ The Khmer Today