ការសែតអន្តរជាតិ ​Nikkei Asia រាយការណ៍អំពីការសាងសង់របងបន្លាលួសតាមបណ្តោយព្រំដែនរបស់ថៃ

ការសែតអន្តរជាតិ ​Nikkei Asia រាយការណ៍អំពីការសាងសង់របងបន្លាលួសតាមបណ្តោយព្រំដែនរបស់ថៃ

ភ្នំពេញ៖ រដ្ឋាភិបាលថៃកំពុងបន្តសាងសង់របងការពារ បំពាក់ដោយលួសបន្លា តាមបណ្តោយផ្នែកខ្លះនៃព្រំដែនកម្ពុជា-ថៃ បន្ទាប់ពីការប៉ះទង្គិចប្រដាប់អាវុធរវាងប្រទេសទាំងពីរកាលពីឆ្នាំមុន។ ទោះបីស្ថានភាពយោធាបានស្ងប់ស្ងាត់អស់រយៈពេលជាច្រើនខែក៏ដោយ ប៉ុន្តែវិវាទព្រំដែននៅតែមិនទាន់មានដំណោះស្រាយជាអចិន្ត្រៃយ៍។

ក្នុងអំឡុងពេលចុះពិនិត្យការសាងសង់របងនេះ មេបញ្ជាការកងទ័ពជាន់ខ្ពស់ថៃ លោក ឧត្តមសេនីយ៍ Ukrit Boontanon (អ៊ុកគ្រីត ប៊ុនតាណុន) បានអះអាងថា "វិធានការនេះមានគោលបំណងការពារសុវត្ថិភាពប្រជាពលរដ្ឋ និងអធិបតេយ្យភាពរបស់ប្រទេសថៃ" នេះបើយោងតាមការផ្សាយរបស់ ការសែត ​Nikkei Asia បានផ្សាយកាលពីថ្ងៃទី២៦ ខែកក្កដា ឆ្នាំ២០២៦ កន្លងមកនេះ។

យ៉ាងណាក៏ដោយ ការសាងសង់របងតាមបណ្តោយព្រំដែននេះ បានបង្កឱ្យមានការព្រួយបារម្ភយ៉ាងខ្លាំងពីភាគីកម្ពុជា។ មន្ត្រីកម្ពុជាបារម្ភថា សកម្មភាពរបស់ថៃអាចជាការប៉ុនប៉ងបង្កើតស្ថានភាពថ្មីនៅតាមបន្ទាត់ព្រំដែន និងអាចប៉ះពាល់ដល់បូរណភាពទឹកដីរបស់កម្ពុជា ប្រសិនបើការសាងសង់ធ្វើឡើងនៅតំបន់ដែលមិនទាន់មានការឯកភាពលើការកំណត់ព្រំដែន។

រហូតមកដល់ពេលនេះ មិនទាន់មានសញ្ញាវិជ្ជមានណាមួយបង្ហាញថា ការចរចាររវាងកម្ពុជា និងថៃ ដើម្បីដោះស្រាយវិវាទព្រំដែនដោយសន្តិវិធី នឹងត្រូវចាប់ផ្តើមឡើងវិញក្នុងពេលឆាប់ៗនេះទេ។

ទន្ទឹមនឹងនេះ ការបន្តបិទច្រកព្រំដែន និងភាពតានតឹងដែលនៅអូសបន្លាយ បានធ្វើឱ្យប្រជាពលរដ្ឋរស់នៅតាមតំបន់ព្រំដែននៃប្រទេសទាំងពីរ ជាពិសេសប្រជាពលរដ្ឋកម្ពុជា ទទួលរងផលប៉ះពាល់ផ្នែកជីវភាពយ៉ាងធ្ងន់ធ្ងរ ខណៈសកម្មភាពពាណិជ្ជកម្ម ការដឹកជញ្ជូនទំនិញ និងអាជីវកម្មឆ្លងដែនជាច្រើននៅតែជាប់គាំង។

ប្រភព៖ ការសែត ​Nikkei Asia

https://asia.nikkei.com/photos/in-focus-thai-military-builds-cambodia-border-wall

រាយការណ៍ដោយ៖ The Khmer Today