រដ្ឋាភិបាលថៃប្រឈមនឹងវិបត្តិផ្ទៃក្នុង ខណៈរឿងអាស្រូវពុករលួយជាច្រើនកំពុងផ្ទុះឡើង

បាងកក៖ រដ្ឋាភិបាលចម្រុះរបស់នាយករដ្ឋមន្ត្រីថៃ លោក អានុធីន ចានវីរ៉ាកុល (Anutin Charnvirakul) កំពុងប្រឈមសម្ពាធផ្នែកនយោបាយកាន់តែខ្លាំង បន្ទាប់ពីអាស្រូវពុករលួយជាច្រើនបានផ្ទុះឡើងក្នុងរយៈពេលជិត ៤ ខែនៃការកាន់អំណាច។ ស្ថានការណ៍នេះបានធ្វើឱ្យមានការចោទសួរអំពីស្ថិរភាពរបស់រដ្ឋាភិបាល ខណៈបក្សប្រឆាំងកំពុងត្រៀមដាក់ញត្តិដេញដោលអត់ទំនុកចិត្តលើរដ្ឋាភិបាល។ នេះបើយោងតាមការចុះផ្សាយរបស់កាសែត Bangkok Post នៅថ្ងៃទី៦ ខែសីហា ឆ្នាំ២០២៦។

ប្រភពដដែលបានឱ្យដឹងថា សំណុំរឿងដែលកំពុងទាក់ទាញការចាប់អារម្មណ៍ខ្លាំងជាងគេ គឺការស៊ើបអង្កេតលើការចោទប្រកាន់អំពីការលួចបន្លំ និងសូកប៉ាន់ក្នុងការប្រឡងជ្រើសរើសមន្ត្រីរាជការមូលដ្ឋាន ក្រោមក្រសួងមហាផ្ទៃ។

ការស៊ើបអង្កេតបានរកឃើញការចោទប្រកាន់ថា មានការកែប្រែសន្លឹកប្រឡង និងការបង់ប្រាក់សូកប៉ាន់ដែលអាចមានទំហំរហូតដល់ ៤,៥ ប៊ីលានបាត (ប្រមាណ ១៣០ លានដុល្លារ)។ អាជ្ញាធរថៃកំពុងពិចារណាលុបចោលលទ្ធផលបេក្ខជនជោគជ័យជិត ៦.០០០ នាក់ ខណៈការស៊ើបអង្កេតកំពុងពង្រីកទៅរកបណ្តាញអ្នកនយោបាយក្នុងតំបន់មួយចំនួន។

ក្រៅពីសំណុំរឿងនេះ រដ្ឋាភិបាលថៃក៏កំពុងរងការរិះគន់ជុំវិញគម្រោង TH-AI Passport តម្លៃ ១,៦២ ប៊ីលានបាត ដែលស្ថិតក្រោមការគ្រប់គ្រងរបស់ក្រសួងសេដ្ឋកិច្ច និងសង្គមឌីជីថល។ បក្សប្រឆាំងបានចោទប្រកាន់ថា លក្ខខណ្ឌនៃការដេញថ្លៃត្រូវបានរៀបចំឡើងដើម្បីផ្តល់អត្ថប្រយោជន៍ដល់ក្រុមហ៊ុនដែលមានទំនាក់ទំនងជាមួយអ្នកនយោបាយ ប៉ុន្តែការចោទប្រកាន់នេះនៅមិនទាន់ត្រូវបានបញ្ជាក់ជាផ្លូវការនៅឡើយ។ ទន្ទឹមនឹងនេះ គណៈកម្មាធិការរៀបចំការបោះឆ្នោត (EC) និងនាយកដ្ឋានស៊ើបអង្កេតពិសេស (DSI) ក៏កំពុងបន្តស៊ើបអង្កេតលើការចោទប្រកាន់ពាក់ព័ន្ធនឹងការបោះឆ្នោតជ្រើសរើសសមាជិកព្រឹទ្ធសភាឆ្នាំ២០២៥ ដែលមានបុគ្គលជាង ២០០ នាក់ស្ថិតក្រោមការស៊ើបអង្កេតផងដែរ។

ជាមួយគ្នានេះ បក្សប្រឆាំងប្រជាជន (People's Party - PP) បានប្រកាសថា នឹងរៀបចំការដេញដោលអត់ទំនុកចិត្តលើនាយករដ្ឋមន្ត្រី និងគណៈរដ្ឋមន្ត្រីនាពេលខាងមុខ។ ទោះបីជាមានការលេចឮព័ត៌មានអំពីការរៀបចំសម្ព័ន្ធភាពនយោបាយថ្មីក៏ដោយ ក្រុមអ្នកវិភាគភាគច្រើនយល់ថា លទ្ធភាពនៃការផ្លាស់ប្តូររដ្ឋាភិបាលនៅពេលនេះនៅមានកម្រិតទាប ដោយសារភាពខុសគ្នាផ្នែកនយោបាយរវាងគណបក្សធំៗ។

អ្នកវិភាគនយោបាយថៃវាយតម្លៃថា អនាគតរបស់រដ្ឋាភិបាលនឹងពឹងផ្អែកយ៉ាងខ្លាំងលើរបៀបដែលអាជ្ញាធរដោះស្រាយសំណុំរឿងពុករលួយទាំងនេះ។ ប្រសិនបើការស៊ើបអង្កេតត្រូវបានអនុវត្តដោយតម្លាភាព និងគ្មានការលំអៀង នោះអាចជួយស្តារទំនុកចិត្តសាធារណៈឡើងវិញបាន។ ប៉ុន្តែប្រសិនបើការស៊ើបអង្កេតមិនអាចឈានដល់ការទទួលខុសត្រូវរបស់អ្នកពាក់ព័ន្ធទេ វាអាចបង្កើនសម្ពាធនយោបាយ និងប៉ះពាល់ដល់ស្ថិរភាពរបស់រដ្ឋាភិបាលថៃនាពេលខាងមុខ។

ប្រភព៖ Bang KokPost

https://www.bangkokpost.com/thailand/politics/3297227/stern-test-from-within

រាយការណ៍ដោយ៖ The Khmer Today