International
ក្រុមហ៊ុនអាកាសចរណ៍ Thai Airways ជួបរឿងធ្ងន់! ប្រាក់ចំណេញត្រីមាសទី២ ធ្លាក់ចុះជាង ៨៦%
ភ្នំពេញ ថ្ងៃទី13 ខែសីហា ឆ្នាំ2026៖ ក្រុមហ៊ុនអាកាសចរណ៍ជាតិថៃ Thai Airways International (THAI) កំពុងប្រឈមនឹងសម្ពាធលើលទ្ធផលហិរញ្ញវត្ថុ បន្ទាប់ពីក្រុមហ៊ុនបានរាយការណ៍ថា ប្រាក់ចំណេញសុទ្ធក្នុងត្រីមាសទី២ ឆ្នាំ២០២៦ មានត្រឹម ១.៥៤ពាន់លានបាត ធ្លាក់ចុះជាង ៨៦% បើធៀបនឹង ១២.១៣ពាន់លានបាត ក្នុងរយៈពេលដូចគ្នាកាលពីឆ្នាំ២០២៥។ ការធ្លាក់ចុះនេះកើតឡើង ទោះបីក្រុមហ៊ុនអាចបង្កើនចំណូលបានក៏ដោយ។
តាមសេចក្តីប្រកាសរបស់ Thai Airways ចំណូលសរុបក្នុងត្រីមាសទី២ មាន ៤៨.៦២ពាន់លានបាត កើនឡើង ៨.៥% ពីមួយឆ្នាំទៅមួយឆ្នាំ។ ប៉ុន្តែចំណាយសរុបក៏បានកើនឡើងខ្លាំងដល់ ៤៤.៩៣ពាន់លានបាត ឬកើន ២៩.៧% ដែលក្រុមហ៊ុនបញ្ជាក់ថា ភាគច្រើនបណ្តាលមកពីការកើនឡើងនៃតម្លៃប្រេងឥន្ធនៈយន្តហោះ ចំពេលមានភាពចលាចលនៅតំបន់មជ្ឈិមបូព៌ា។ តម្លៃប្រេងឥន្ធនៈជាមធ្យមបានកើនឡើងរហូតដល់ ១០៤.៦% បើធៀបនឹងឆ្នាំមុន។
ក្រៅពីសម្ពាធពីថ្លៃប្រេង ក្រុមហ៊ុនក៏រងផលប៉ះពាល់ពីការថយចុះនៃសកម្មភាពធ្វើដំណើរតាមផ្លូវអាកាស។ គិតត្រឹមថ្ងៃទី៣០ ខែមិថុនា ឆ្នាំ២០២៦ Thai Airways មានយន្តហោះចំនួន ៨៤គ្រឿង និងបានដឹកអ្នកដំណើរសរុបប្រមាណ ៣.៦៦លាននាក់។ ទោះជាយ៉ាងណា ចម្ងាយដឹកអ្នកដំណើរ (RPK) បានធ្លាក់ចុះ ១១.៣% ខណៈអត្រាកាន់កាប់កៅអីជាមធ្យមធ្លាក់ពី ៧៧% មក ៧១.៥% ដោយសារការកាត់បន្ថយជើងហោះហើរ និងការថយចុះនៃតម្រូវការធ្វើដំណើរ ដែលពាក់ព័ន្ធនឹងភាពចលាចលនៅមជ្ឈិមបូព៌ា។
ទោះបីប្រាក់ចំណេញត្រីមាសទី២ ធ្លាក់ចុះខ្លាំងក៏ដោយ លទ្ធផលសម្រាប់ឆមាសទី១ ឆ្នាំ២០២៦ នៅតែបង្ហាញពីការរកប្រាក់ចំណេញ។ Thai Airways ទទួលបានចំណូលសរុប ៩៩.៦៥ពាន់លានបាត កើន ៣.៣% ខណៈចំណាយកើន ១៤.៤% ដល់ ៨២.២១ពាន់លានបាត។ ក្រុមហ៊ុនក៏ទទួលបានចំណូលពីប្រតិបត្តិការតែម្តងចំនួន ១.៤២ពាន់លានបាត ដែលភាគច្រើនមកពីការបញ្ចប់ និងកែប្រែកិច្ចសន្យាជួលយន្តហោះ។
ជាលទ្ធផល Thai Airways រកបាន ប្រាក់ចំណេញសុទ្ធ ១១.៦៤ពាន់លានបាត ក្នុងឆមាសទី១ ឆ្នាំ២០២៦។ ទន្ទឹមនឹងនេះ គិតត្រឹមចុងខែមិថុនា ក្រុមហ៊ុនមានទ្រព្យសកម្មសរុប ៣២២.០៨ពាន់លានបាត បំណុលសរុប ២៤០.២៥ពាន់លានបាត និងសាច់ប្រាក់ ព្រមទាំងទ្រព្យសកម្មហិរញ្ញវត្ថុរយៈពេលខ្លីផ្សេងទៀត សរុប ១២៣.៧៦ពាន់លានបាត។
លទ្ធផលនេះបង្ហាញថា បញ្ហាសំខាន់របស់ក្រុមហ៊ុននៅត្រីមាសទី២ គឺការកើនឡើងយ៉ាងខ្លាំងនៃចំណាយ ខណៈតម្លៃប្រេង និងភាពមិនប្រាកដប្រជានៃការធ្វើដំណើរតាមផ្លូវអាកាសនៅតំបន់មជ្ឈិមបូព៌ា នៅតែជាកត្តាដាក់សម្ពាធលើប្រាក់ចំណេញរបស់ក្រុមហ៊ុន។
ប្រភព៖ bangkokpost
https://www.bangkokpost.com/business/general/3300505/thai-airways-net-profit-plunged-in-q2
Flight Global
The Nation Thailand
https://www.nationthailand.com/business/corporate/40069687
រាយការណ៍ដោយ៖ The Khmer Today
