International
សាលារៀនថៃបង្កើនការហ្វឹកហាត់សិស្ស ឱ្យចេះរត់ និងលាក់ខ្លួនពេលមានការបាញ់ប្រហារក្នុងថ្នាក់រៀន
បាងកក៖ សាលារៀននៅប្រទេសថៃកំពុងបង្កើនការហ្វឹកហាត់សិស្សអំពីវិធីឆ្លើយតប និងគេចខ្លួន ប្រសិនបើមានការបាញ់ប្រហារកើតឡើងនៅក្នុងសាលារៀន ជាពិសេសក្នុងថ្នាក់រៀន។ វិធានការនេះត្រូវបានអនុវត្តបន្ទាប់ពីក្មេងប្រុសអាយុ១៤ឆ្នាំម្នាក់បានបើកការបាញ់ប្រហារនៅសាលារៀនកាលពីថ្ងៃទី៧ ខែសីហា បណ្តាលឱ្យមនុស្សយ៉ាងហោចណាស់៨នាក់ស្លាប់។ នេះបើយោងតាមការចុះផ្សាយរបស់ Reuters នៅថ្ងៃទី១៩ ខែសីហា ឆ្នាំ២០២៦។
នៅសាលា Surasakmontree ក្នុងទីក្រុងបាងកក សិស្សបានចូលរួមក្នុងការហ្វឹកហាត់ «រត់-លាក់ខ្លួន-ប្រយុទ្ធ» (Run, Hide, Fight)។ ក្នុងការហ្វឹកហាត់ មន្ត្រីប៉ូលិសម្នាក់បានសម្តែងជាអ្នកវាយប្រហារក្លែងក្លាយ ដោយកាន់កាំភ្លើងខ្លី និងកាំភ្លើងវែងដែលប្រើគ្រាប់ទទេ។ សិស្សបានហ្វឹកហាត់រត់ចេញពីអ្នកវាយប្រហារ លាក់ខ្លួនក្រោមតុ និងនៅពីក្រោយទ្វារដែលបានចាក់សោ ខណៈក្នុងសេណារីយ៉ូមួយ សិស្សមួយចំនួនបានប្រើគ្រឿងសង្ហារឹមរាំងខ្ទប់ច្រកចូលថ្នាក់រៀន។
តាម Reuters សមយុទ្ធនេះធ្វើឡើងបន្ទាប់ពីសេចក្តីណែនាំរបស់ក្រសួងអប់រំថៃ ដែលចុះហត្ថលេខាដោយរដ្ឋមន្ត្រីក្រសួងអប់រំ លោក Prasert Jantararuangtong កាលពីថ្ងៃទី១០ ខែសីហា ដោយតម្រូវឱ្យសាលារៀនរៀបចំផែនការសន្តិសុខ និងហ្វឹកហាត់នីតិវិធីឆ្លើយតបពេលមានអាសន្ន។ សាលា Surasakmontree ក៏បានបង្កើនការត្រួតពិនិត្យសន្តិសុខប្រចាំថ្ងៃ ដោយប្រើឧបករណ៍រាវរកលោហៈ និងត្រួតពិនិត្យកាបូបសិស្ស។
មន្ត្រីប៉ូលិសថៃបាននិយាយថា សាលារៀននានាកំពុងបង្កើនការប្រុងប្រយ័ត្ន និងកែសម្រួលផែនការសន្តិសុខ ដើម្បីត្រៀមឱ្យសិស្សអាចឆ្លើយតបចំពោះហេតុការណ៍ និងការគំរាមកំហែងគ្រប់ប្រភេទ។ លោកស្រី Onitcha Kochana នាយិកាសាលា Surasakmontree បាននិយាយថា ការហ្វឹកហាត់នេះអាចជួយផ្តល់ចំណេះដឹង និងការយល់ដឹងដល់សិស្ស ដើម្បីឱ្យពួកគេអាចយកអ្វីដែលបានរៀនទៅប្រើប្រាស់ ប្រសិនបើជួបស្ថានការណ៍អាសន្នពិតប្រាកដ។
ប្រភព៖ Reuter
រាយការណ៍ដោយ៖ The Khmer Today
