International
លោក Trump ព្រមានប្រទេសជួយ ឬធ្វើពាណិជ្ជកម្មជាមួយអ៊ីរ៉ង់ អាចប្រឈមផលវិបាកសេដ្ឋកិច្ចធ្ងន់ធ្ងរ
ភ្នំពេញ ថ្ងៃទី២១ ខែសីហា ឆ្នាំ២០២៦ — ប្រធានាធិបតីសហរដ្ឋអាមេរិក លោក Donald Trump បានព្រមានថា ប្រទេសណាដែលជួយ ឬធ្វើអាជីវកម្មជាមួយអ៊ីរ៉ង់ នឹងប្រឈម «ផលវិបាកសេដ្ឋកិច្ចធ្ងន់ធ្ងរ» ខណៈរដ្ឋាភិបាលក្រុងវ៉ាស៊ីនតោនកំពុងបង្កើនសម្ពាធសេដ្ឋកិច្ចលើទីក្រុងតេអេរ៉ង់។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី២០ ខែសីហា ឆ្នាំ២០២៦។
លោក Trump បានប្រកាសតាមបណ្តាញសង្គម Truth Social ថា សហរដ្ឋអាមេរិកកំពុងចាប់ផ្តើមអ្វីដែលលោកហៅថា «ប្រតិបត្តិការសេដ្ឋកិច្ចដ៏ខ្លាំងក្លាបំផុត» ប្រឆាំងនឹងអ៊ីរ៉ង់។ លោកបានព្រមានថា ប្រទេសណាដែលអនុញ្ញាតឱ្យស្ថាប័នហិរញ្ញវត្ថុ ក្រុមហ៊ុន អាកាសយានដ្ឋាន ឬស្ថាប័នរដ្ឋរបស់ខ្លួនផ្តល់មធ្យោបាយគាំទ្រណាមួយដល់អ៊ីរ៉ង់ អាចប្រឈមនឹងវិធានការសេដ្ឋកិច្ចធ្ងន់ធ្ងរ។ ទោះជាយ៉ាងណា លោកមិនបានបញ្ជាក់ថា ប្រទេសណាមួយជាក់លាក់នឹងរងវិធានការនោះឡើយ។
ការព្រមាននេះក៏បានសំដៅលើសកម្មភាពពាណិជ្ជកម្ម និងហិរញ្ញវត្ថុដែលអាចជួយអ៊ីរ៉ង់ ដូចជា ការរត់ពន្ធប្រេង ការផ្ទេរប្រាក់ ការប្តូររូបិយប័ណ្ណ ការចុះបញ្ជីនាវា និងការប្រើប្រាស់ក្រុមហ៊ុនជាអន្តរការី។ សារព័ត៌មាន BBC News និង Reuters រាយការណ៍ថា វិធានការរបស់អាមេរិកអាចបង្កផលប៉ះពាល់ដល់ប្រទេសមួយចំនួនដែលមានទំនាក់ទំនងពាណិជ្ជកម្មជាមួយអ៊ីរ៉ង់ ជាពិសេសចិន ដែលជាអ្នកទិញប្រេងអ៊ីរ៉ង់ដ៏ធំបំផុតមួយ។
ការព្រមានរបស់លោក Trump កើតឡើងបន្ទាប់ពីបទឈប់បាញ់រយៈពេល៦០ថ្ងៃជាមួយអ៊ីរ៉ង់បានផុតកំណត់កាលពីថ្ងៃចន្ទ ខណៈមិនទាន់ឃើញមានផ្លូវច្បាស់លាស់សម្រាប់ការដោះស្រាយតាមការទូត ឬយោធានៅឡើយ។ ទន្ទឹមនឹងនេះ រដ្ឋមន្ត្រីក្រសួងរតនាគារអាមេរិក លោក Scott Bessent បានប្រកាសថា ទីក្រុងវ៉ាស៊ីនតោននឹងដាក់ «ទណ្ឌកម្មដ៏តឹងរ៉ឹងបំផុតក្នុងប្រវត្តិសាស្ត្រ» លើអ៊ីរ៉ង់ និងបានអំពាវនាវឱ្យចិនចូលរួមក្នុងការដាក់សម្ពាធលើទីក្រុងតេអេរ៉ង់។
សម្រាប់ពេលនេះ លោក Trump មិនទាន់បង្ហាញព័ត៌មានលម្អិតអំពីវិធានការសេដ្ឋកិច្ចជាក់លាក់ដែលនឹងត្រូវអនុវត្តចំពោះប្រទេសដែលបន្តធ្វើពាណិជ្ជកម្ម ឬផ្តល់ជំនួយដល់អ៊ីរ៉ង់នោះទេ។ ការវិវត្តន៍នេះត្រូវបានមើលឃើញថា អាចបង្កើនសម្ពាធលើប្រទេសដែលមានទំនាក់ទំនងពាណិជ្ជកម្មជាមួយអ៊ីរ៉ង់ និងអាចបង្កភាពតានតឹងបន្ថែមក្នុងទំនាក់ទំនងរវាងសហរដ្ឋអាមេរិក និងដៃគូពាណិជ្ជកម្មសំខាន់ៗរបស់អ៊ីរ៉ង់។
ប្រភព៖ BBC News
https://www.bbc.com/news/articles/c2k7e83ynj4o
Dawn
រាយការណ៍ដោយ៖ The Khmer Today