AOT ចុះពិនិត្យតំបន់បឹងត្រកួន ខណៈទូកុងតឺន័រ ១៤ទីតាំង បានរារាំងពលរដ្ឋជិត៨ពាន់នាក់មិនឱ្យវិលត្រឡប់ទៅផ្ទះវិញ

ភ្នំពេញ ថ្ងៃទី២៤ ខែសីហា ឆ្នាំ២០២៦៖ ក្រុមអ្នកសង្កេតការណ៍អាស៊ានប្រចាំកម្ពុជា (AOT-KH) បានចុះពិនិត្យ និងផ្ទៀងផ្ទាត់ស្ថានភាពតាមបណ្តោយព្រំដែនកម្ពុជា-ថៃ នៅតំបន់ច្រកបឹងត្រកួន ខេត្តបន្ទាយមានជ័យ កាលពីថ្ងៃទី២៣ ខែសីហា ខណៈក្រសួងការពារជាតិកម្ពុជាអះអាងថា យោធាថៃបានដាក់ពង្រាយកុងតឺន័រសរុប៤៤ នៅ១៤ទីតាំង ដែលបានរារាំងប្រជាពលរដ្ឋកម្ពុជាចំនួន៧,៨៧៣នាក់ មិនទាន់អាចវិលត្រឡប់ទៅផ្ទះវិញបាន។

យោងតាមការចុះផ្សាយរបស់ក្រសួងព័ត៌មាន និងសេចក្តីប្រកាសរបស់អ្នកនាំពាក្យក្រសួងការពារជាតិកម្ពុជា ក្រុមអ្នកសម្របសម្រួលកម្ពុជា (CLG) បានសម្របសម្រួលឱ្យ AOT-KH ដឹកនាំដោយប្រធានបេសកកម្មមកពីប្រទេសហ្វីលីពីន ចុះសង្កេតការណ៍នៅតំបន់ច្រកបឹងត្រកួន ឃុំគោករមៀត ស្រុកថ្មពួក ខេត្តបន្ទាយមានជ័យ ដើម្បីសង្កេត ផ្ទៀងផ្ទាត់ និងរាយការណ៍អំពីស្ថានភាពជាក់ស្តែងនៅតាមព្រំដែន។ ក្រសួងការពារជាតិអះអាងថា កុងតឺន័រទាំង៤៤ ស្ថិតនៅ១៤ទីតាំង ហើយប៉ះពាល់ដល់ប្រជាពលរដ្ឋចំនួន១,៨៦៩គ្រួសារ ក្នុងនោះមានកុមារ១,៨៤៧នាក់។

ក្រសួងការពារជាតិកម្ពុជាបានលើកឡើងថា ការចុះសង្កេតការណ៍របស់ AOT-KH បានបង្ហាញពីភាពចាំបាច់ក្នុងការចាប់ផ្តើមការងារវាស់វែង និងខណ្ឌសីមាព្រំដែនតាមរយៈគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) ឱ្យបានឆាប់។ តាមការអះអាងរបស់ក្រសួង ការងារនេះគួរត្រូវអនុវត្តស្របតាមក្របខណ្ឌ និងកិច្ចព្រមព្រៀងដែលភាគីទាំងពីរបានឯកភាព ដើម្បីឱ្យប្រជាពលរដ្ឋដែលមិនទាន់អាចវិលត្រឡប់ទៅលំនៅដ្ឋាន អាចត្រឡប់ដោយសុវត្ថិភាព និងគ្មានការរារាំង។

កម្ពុជា ក៏បានបញ្ជាក់ជំហរថា ខ្លួនមិនទទួលស្គាល់ការផ្លាស់ប្តូរខ្សែព្រំដែនណាមួយដែលខ្លួនចាត់ទុកថាកើតចេញពីការប្រើប្រាស់កម្លាំង ឬការបង្កើតស្ថានភាពជាក់ស្តែងនៅលើដី ហើយនឹងបន្តតវ៉ាតាមផ្លូវការចំពោះសកម្មភាពឯកតោភាគីដែលប៉ះពាល់ដល់បូរណភាពទឹកដីកម្ពុជា។ ជំហរនេះត្រូវបានរំលេចផងដែរក្នុងសេចក្តីប្រកាសមុនៗរបស់ក្រសួងការពារជាតិកម្ពុជា ស្តីពីតំបន់បឹងត្រកួន និងការងាររបស់ AOT-KH។

ប្រភពយោង៖ ក្រសួងការពារជាតិ

https://www.facebook.com/share/p/1DH5rjV1GX/?mibextid=wwXIfr

រាយការណ៍ដោយ៖ The Khmer Today