រដ្ឋមន្ត្រីការបរទេសថៃបង្ហាញការព្រួយបារម្ភ ក្រោយហេតុការណ៍អសន្តិសុខនៅភាគខាងត្បូងកើតឡើងជាង ៥០កន្លែង

ភ្នំពេញ ថ្ងៃទី២៤ ខែសីហា ឆ្នាំ២០២៦៖ លោក សីហស័ក្តិ ពួងកេតកែវ ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ បានបង្ហាញការព្រួយបារម្ភចំពោះស្ថានការណ៍អសន្តិសុខនៅតំបន់ភាគខាងត្បូងប្រទេសថៃ បន្ទាប់ពីមានហេតុការណ៍កើតឡើងជាង ៥០ទីតាំង ខណៈលោកត្រៀមពិភាក្សាជាមួយភាគីសន្តិសុខ ដើម្បីវាយតម្លៃស្ថានការណ៍ និងពិនិត្យវិធានការការពារនាពេលបន្ទាប់។ យោងតាមការចុះផ្សាយរបស់សារព័ត៌មាន The Standard នៅថ្ងៃទី២៤ ខែសីហា ឆ្នាំ២០២៦ លោកបានបញ្ជាក់ថា ភាគីពាក់ព័ន្ធត្រូវពិនិត្យឡើងវិញទាំងការងារស៊ើបការណ៍ និងការត្រៀមខ្លួន ដើម្បីធានាថាការការពារនៅគ្រប់ទីតាំងមានភាពរឹងមាំជាងមុន។

ជាមួយគ្នានេះ លោក Boonchua Homyamyen អភិបាលខេត្ត Narathiwat បានឱ្យដឹងថា ហេតុការណ៍ដែលកើតឡើងនៅថ្ងៃទី២២ ខែសីហា ឆ្នាំ២០២៦ ប្រហែលម៉ោង ៨យប់ តាមការពិនិត្យបឋមរកឃើញចំនួន ៤០ហេតុការណ៍ រួមមាន ការដុតកម្ទេច ៩កន្លែង ការផ្ទុះគ្រាប់បែក ១៥កន្លែង ការបង្កចលាចល ១៣កន្លែង ដូចជាដុតកង់រថយន្ត និងបំផ្លាញកាមេរ៉ា CCTV និងការលបបាញ់ ១ករណី នៅក្នុងស្រុក Chanae។ ចំពោះទ្រព្យសម្បត្តិដែលរងការខូចខាត រួមមាន អគាររដ្ឋបាលឃុំ (SAO) ៤កន្លែង រថយន្តរដ្ឋ ៥គ្រឿង រថយន្តឯកជន ៤គ្រឿង គ្រឿងចក្រធុនធ្ងន់ ១៨គ្រឿង រោងចក្រទិញឈើកៅស៊ូ ១កន្លែង និងផ្ទះប្រជាពលរដ្ឋ ២ខ្នង។

លោក សីហស័ក្តិ បានទទួលស្គាល់ថា ស្ថាប័នសន្តិសុខថៃមានព័ត៌មានជាមុនអំពីការរៀបចំប្រតិបត្តិការរបស់ក្រុមអ្នកបង្កហេតុ ប៉ុន្តែការកំណត់ពេលវេលា និងទីតាំងជាក់លាក់ដែលហេតុការណ៍នឹងកើតឡើង នៅតែជាបញ្ហាប្រឈម។ លោកពន្យល់ថា ប្រតិបត្តិការបែបនេះអាចត្រូវបានបែងចែកទៅកាន់ទីតាំងជាច្រើនក្នុងពេលតែមួយ ដែលធ្វើឱ្យការព្យាករណ៍ និងការទប់ស្កាត់ជាមុនមានភាពលំបាក។ លោកបានសង្កត់ធ្ងន់ថា ត្រូវពិនិត្យឡើងវិញទាំងប្រព័ន្ធព័ត៌មានស៊ើបការណ៍ និងការត្រៀមខ្លួនរបស់ភាគីសន្តិសុខ ដើម្បីទប់ស្កាត់កុំឱ្យហេតុការណ៍ស្រដៀងគ្នាកើតឡើងម្ដងទៀត និងកាត់បន្ថយផលប៉ះពាល់ដល់ប្រជាពលរដ្ឋ។

ចំពោះកិច្ចសហប្រតិបត្តិការជាមួយម៉ាឡេស៊ី លោកបានបញ្ជាក់ថា ភាគីម៉ាឡេស៊ីបានត្រៀមខ្លួនសហការជាមួយថៃ ប្រសិនបើមានការស្នើសុំព័ត៌មាន ឬជំនួយក្នុងការតាមរកអ្នកបង្កហេតុដែលអាចឆ្លងព្រំដែន។ លោកថា កិច្ចពិភាក្សាអំពីការសហការនេះបានចាប់ផ្តើមតាំងពីដំណើរទស្សនកិច្ចរបស់នាយករដ្ឋមន្ត្រីថៃទៅម៉ាឡេស៊ី ហើយភាគីថៃនឹងពិនិត្យបន្ថែមថា អ្នកបង្កហេតុជានរណា និងអាចរត់គេចទៅទីណា។ ចំពោះការលើកឡើងថា ហេតុការណ៍អាចពាក់ព័ន្ធនឹងការប៉ុនប៉ងធ្វើឱ្យមន្ត្រីរដ្ឋបាត់បង់ភាពជឿជាក់ ដោយសារវិធានការបង្ក្រាបការជួញដូរទំនិញខុសច្បាប់ លោក សីហស័ក្តិ មិនទាន់ធ្វើការសន្និដ្ឋានឡើយ ដោយបញ្ជាក់ថា ត្រូវពិភាក្សាជាមួយស្ថាប័នពាក់ព័ន្ធ ដើម្បីស្វែងរកមូលហេតុ និងកត្តាដែលពាក់ព័ន្ធជាមុនសិន។ ទន្ទឹមនឹងនេះ នាយករដ្ឋមន្ត្រីថៃបានបញ្ជាឱ្យមានការជួយសង្គ្រោះ និងផ្តល់សំណងពេញលេញដល់ប្រជាពលរដ្ឋដែលរងផលប៉ះពាល់។

ប្រភព៖The Standard

https://thestandard.co/sihasak-southern-border-security/

The Reporters

https://www.facebook.com/TheReportersTH

រាយការណ៍ដោយ៖ The Khmer Today