រុស្ស៊ី និងវៀតណាម ចុះហត្ថលេខាលើកិច្ចព្រមព្រៀងសាងសង់រោងចក្រថាមពលនុយក្លេអ៊ែរ

រុស្ស៊ី និងវៀតណាម ចុះហត្ថលេខាលើកិច្ចព្រមព្រៀងសាងសង់រោងចក្រថាមពលនុយក្លេអ៊ែរ

ទីក្រុងមូស្គូ, ថ្ងៃទី ២៣ ខែមីនា — យោងតាមទីភ្នាក់ងារសារព័ត៌មាន Reuters សាជីវកម្មថាមពលនុយក្លេអ៊ែររដ្ឋរបស់រុស្ស៊ី Rosatom បានឱ្យដឹងថា ប្រទេសរុស្ស៊ី និងវៀតណាម បានចុះហត្ថលេខាលើកិច្ចព្រមព្រៀងអន្តររដ្ឋាភិបាល ស្តីពីកិច្ចសហប្រតិបត្តិការក្នុងការសាងសង់រោងចក្រថាមពលនុយក្លេអ៊ែរនៅក្នុងប្រទេសវៀតណាម។

កិច្ចព្រមព្រៀងនេះ គ្របដណ្តប់លើការអភិវឌ្ឍរោងចក្រថាមពលនុយក្លេអ៊ែរ Ninh Thuan 1 រួមទាំងការសាងសង់អង្គភាពថាមពលចំនួនពីរ ដែលរចនាឡើងដោយបច្ចេកវិទ្យារុស្ស៊ី និងមានសមត្ថភាពផលិតសរុបចំនួន ២.៤០០ មេហ្គាវ៉ាត់។ ទោះជាយ៉ាងណាក៏ដោយ ព័ត៌មានលម្អិតផ្នែកហិរញ្ញវត្ថុនៃគម្រោងនេះ មិនត្រូវបានបង្ហាញឱ្យដឹងនៅឡើយទេ។

ការចុះហត្ថលេខាលើកិច្ចព្រមព្រៀងនេះ កើតឡើងក្នុងខណៈពេលដែលវៀតណាមកំពុងស្វែងរកការពង្រីកការផ្គត់ផ្គង់អគ្គិសនីរបស់ខ្លួន ដើម្បីឆ្លើយតបទៅនឹងតម្រូវការដែលកំពុងកើនឡើងពីវិស័យឧស្សាហកម្ម និងការរីកចម្រើននៃជីវភាពប្រជាជន ចំពេលមានការខ្វះខាតអគ្គិសនីកើតឡើងដដែលៗ និងការរំខានដែលបង្កឡើងដោយកត្តាអាកាសធាតុ។

យោងតាម Reuters វៀតណាមធ្លាប់បានផ្អាកកម្មវិធីថាមពលនុយក្លេអ៊ែររបស់ខ្លួនកាលពីឆ្នាំ ២០១៦ ដោយសារក្តីបារម្ភផ្នែកសុវត្ថិភាព និងបញ្ហាថវិកា បើទោះបីជាពីមុនមក ខ្លួនបានប្រគល់គម្រោង Ninh Thuan 1 នេះទៅឱ្យរុស្ស៊ីរួចទៅហើយក៏ដោយ។ កម្មវិធីនេះត្រូវបានស្តារឡើងវិញ ក្នុងឆ្នាំ ២០២៤ ដោយទីក្រុងហាណូយបានចាប់ផ្តើមទាក់ទាញដៃគូនានារួមមានរុស្ស៊ី និងជប៉ុន ប៉ុន្តែក្រោយមកទីក្រុងតូក្យូបានដកខ្លួនចេញពីគម្រោងនេះវិញ។

វៀតណាម និងរុស្ស៊ី បានរក្សាទំនាក់ទំនងជិតស្និទ្ធជាមួយគ្នាយ៉ាងយូរអង្វែងមកហើយ ជាពិសេសលើកិច្ចសហប្រតិបត្តិការក្នុងវិស័យថាមពល និងការពារជាតិ៕

ប្រភព៖https://www.reuters.com/business/energy/russia-vietnam-agree-deal-nuclear-power-plant-construction-2026-03-23/

រាយការណ៍ដោយ៖ The Khmer Today