ឯកឧត្តម នេត្រ ភក្រ្តា៖ បើថៃថា «មិនបានឈ្លានពានកម្ពុជា» ហេតុអ្វីកម្លាំង និងសម្ភារៈយោធាថៃនៅតែស្ថិតលើទីតាំងក្នុងទឹកដីកម្ពុជា?

ភ្នំពេញ ថ្ងៃទី២៦ ខែសីហា ឆ្នាំ២០២៦៖ ឯកឧត្តម នេត្រ ភក្រ្តា បានលើកឡើងថា ប្រសិនបើភាគីថៃអះអាងថា «មិនបានឈ្លានពានកម្ពុជា» នោះគួរបង្ហាញតាមសកម្មភាពជាក់ស្តែង ដោយដកកម្លាំង និងសម្ភារៈយោធាដែលកំពុងស្ថិតនៅលើទីតាំងដែលកម្ពុជាចាត់ទុកថាជាទឹកដីរបស់ខ្លួន ព្រមទាំងដកទូកុងតឺន័រ លួសបន្លា និងរបាំងដែលរារាំងប្រជាពលរដ្ឋកម្ពុជាមិនឱ្យវិលត្រឡប់ទៅលំនៅឋាន និងដីធ្លីរបស់ខ្លួន។ លោកបានសង្កត់ធ្ងន់ថា ការបដិសេធតាមពាក្យសម្តីមិនអាចលុបចោលអង្គហេតុ និងសកម្មភាពដែលអាចមើលឃើញ កំណត់ទីតាំង និងផ្ទៀងផ្ទាត់បាននៅលើទីតាំងជាក់ស្តែងនោះឡើយ។

លោកបានរំលឹកថា ជម្លោះប្រដាប់អាវុធនៅខែកក្កដា និងខែធ្នូ ឆ្នាំ២០២៥ បានបណ្តាលឱ្យមានការបាត់បង់ជីវិត ការបំផ្លិចបំផ្លាញផ្ទះសម្បែង វត្តអារាម និងហេដ្ឋារចនាសម្ព័ន្ធ ព្រមទាំងធ្វើឱ្យប្រជាពលរដ្ឋកម្ពុជាប្រមាណ៦៥ម៉ឺននាក់ត្រូវផ្លាស់ទីលំនៅ។ រហូតមកដល់ពេលនេះ ប្រជាពលរដ្ឋប្រមាណ២ម៉ឺននាក់នៅមិនទាន់អាចវិលត្រឡប់ទៅផ្ទះ និងដីធ្លីរបស់ខ្លួនដោយសុវត្ថិភាពនៅឡើយ ខណៈមានការរាយការណ៍អំពីការដាក់ទូកុងតឺន័រ លួសបន្លា របាំង ការជីកប្រឡាយ ការសាងសង់ផ្លូវ និងការដាក់ទីតាំងយោធានៅតាមតំបន់ជម្លោះ។

ឯកឧត្តម នេត្រ ភក្រ្តា បានបញ្ជាក់ថា បទឈប់បាញ់មិនមែនជាឯកសារផ្ទេរអធិបតេយ្យភាព ឬកំណត់ព្រំដែនថ្មីឡើយ ហើយការឈរជើងដោយកម្លាំងមិនអាចបង្កើតសិទ្ធិអធិបតេយ្យភាពស្របច្បាប់លើទឹកដីបានទេ។

ឯកឧត្តម នេត្រ ភក្រ្តា បានអំពាវនាវឱ្យភាគីថៃទុកបញ្ហាព្រំដែនឱ្យយន្តការដែលភាគីទាំងពីរបានព្រមព្រៀង ជាពិសេសគណៈកម្មការព្រំដែនរួមកម្ពុជា-ថៃ (JBC) ដោះស្រាយតាមច្បាប់ ផែនទី និងកិច្ចព្រមព្រៀងដែលមានស្រាប់។

លោកបានសង្កត់ធ្ងន់ថា ប្រសិនបើថៃពិតជាមិនមានបំណងកាន់កាប់ ឬយកទឹកដីកម្ពុជា នោះគួរដកកម្លាំង និងសម្ភារៈយោធា បញ្ឈប់សកម្មភាពបង្កើតស្ថានភាពជាក់ស្តែងថ្មី អនុញ្ញាតឱ្យប្រជាពលរដ្ឋកម្ពុជាវិលត្រឡប់ទៅលំនៅឋាន និងដីធ្លីរបស់ខ្លួន ហើយប្រគល់ទីតាំងដែលកម្ពុជាចាត់ទុកថាកំពុងត្រូវបានកាន់កាប់ដោយខុសច្បាប់ឱ្យកម្ពុជាវិញ។ លោកបានលើកឡើងថា កងទ័ពមិនមែនជាយន្តការវាស់វែងព្រំដែន ហើយការកាន់កាប់ដោយកម្លាំងក៏មិនមែនជាភស្តុតាងនៃអធិបតេយ្យភាពស្របច្បាប់ដែរ។

ប្រភព៖ Net Pheaktra

https://www.facebook.com/share/p/1c8Eod9ftG/

រាយការណ៍ដោយ៖ The Khmer Today