International
អាមេរិកបើកការវាយប្រហារទីតាំងបាញ់មីស៊ីលអ៊ីរ៉ង់ ២កន្លែងនៅកោះ Larak
ភ្នំពេញ៖ ថ្ងៃទី៣១ ខែសីហា ឆ្នាំ២០២៦ — កងកម្លាំងសហរដ្ឋអាមេរិកបានបើកការវាយប្រហារលើទីតាំងបាញ់អាវុធរបស់អ៊ីរ៉ង់ចំនួន ២កន្លែង នៅលើកោះ Larak (ឡារ៉ាក់) កាលពីថ្ងៃអាទិត្យ ទី៣០ ខែសីហា។ នេះជាការវាយប្រហារលើប្រទេសអ៊ីរ៉ង់លើកដំបូងរបស់អាមេរិក ដែលត្រូវបានគេដឹងថាបានកើតឡើងចាប់តាំងពីចុងខែកក្កដា។ មន្ត្រីអាមេរិកម្នាក់បានបញ្ជាក់ថា កងកម្លាំង IRGC (អាយ-អ័រ-ជី-ស៊ី) ឬកងកម្លាំងបដិវត្តន៍អ៊ីស្លាមអ៊ីរ៉ង់ ត្រូវបានសង្កេតឃើញកំពុងត្រៀមបាញ់រ៉ុក្កែត និងដាក់មីនសមុទ្រចូលទៅក្នុងច្រកសមុទ្រ Hormuz (ហ័រមូស)។
ក្រោយការវាយប្រហាររបស់អាមេរិក អ៊ីរ៉ង់បានបាញ់មីស៊ីលសំដៅទៅលើកងកម្លាំងអាមេរិកដែលឈរជើងនៅប្រទេស Jordan (ហ្សកដានី)។ យោងតាមប្រភពអាមេរិកដែលត្រូវបានរាយការណ៍ដោយសារព័ត៌មាន Fox News (ហ្វកស៍ ន្យូស) មីស៊ីលស្ទើរតែទាំងអស់ត្រូវបានស្ទាក់ចាប់ ហើយមិនទាន់មានការខូចខាតធ្ងន់ធ្ងរត្រូវបានរាយការណ៍នៅឡើយទេ។ ទន្ទឹមនោះ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា ការវាយប្រហាររបស់អាមេរិកបានបណ្តាលឱ្យទាហាន និងប្រជាពលរដ្ឋមួយចំនួនស្លាប់ និងរងរបួស។
កងកម្លាំងបដិវត្តន៍អ៊ីរ៉ង់បានព្រមានថា ការវាយប្រហារនេះនឹងត្រូវបានទីក្រុង Tehran (តេហេរ៉ង់) ឆ្លើយតប និងផ្តន្ទាទោស ខណៈទីភ្នាក់ងារព័ត៌មាន Tasnim (តាស់នីម) បានរាយការណ៍ថា អាមេរិកបានប្រើយន្តហោះគ្មានមនុស្សបើក ដើម្បីវាយប្រហារលើកោះ Larak។ ប្រធានាធិបតីអាមេរិក Donald Trump (ដូណាល់ ត្រាំ) កាលពីសប្តាហ៍មុនបានព្រមានថា នាវា ឬទូកណាដែលដាក់មីនថ្មីនៅក្នុងច្រកសមុទ្រ Hormuz នឹងត្រូវបានបំផ្លាញ។
ជម្លោះរវាងអាមេរិក អ៊ីស្រាអែល និងអ៊ីរ៉ង់បានអូសបន្លាយលើសពី៦ខែ បន្ទាប់ពីអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់កាលពីថ្ងៃទី២៨ ខែកុម្ភៈ។ អ៊ីរ៉ង់បានវាយប្រហារតបលើអ៊ីស្រាអែល និងប្រទេសនៅតំបន់ឈូងសមុទ្រដែលមានមូលដ្ឋានទ័ពអាមេរិក។
សង្គ្រាមនេះបានបណ្តាលឱ្យមនុស្សរាប់ពាន់នាក់ស្លាប់ និងរាប់លាននាក់ត្រូវផ្លាស់ទីលំនៅ ខណៈច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់មួយរបស់ពិភពលោក ត្រូវបានរាំងខ្ទប់ដោយសារជម្លោះ។
ប្រភព៖ Reuters
Axios
https://www.axios.com/2026/08/30/us-iran-strike-hormuz-mines
រាយការណ៍ដោយ៖ The Khmer Today
