ថៃមិនព្រមដកកងទ័ពចេញ ដោយអះអាងថា ខ្លួនគោរពកិច្ចថ្លែងការណ៍រួមដែលភាគីទាំងពីរព្រមព្រៀង រក្សាទីតាំងដដែល និងមិនផ្លាស់ប្តូរកម្លាំង

ភ្នំពេញ៖ ថ្ងៃទី៣១ ខែសីហា ឆ្នាំ២០២៦ — មជ្ឈមណ្ឌលព័ត៌មានរួមរបស់ថៃស្តីពីស្ថានការណ៍ថៃ-កម្ពុជា (JIC) បានបញ្ជាក់ថា កងកម្លាំងថៃនឹងបន្តរក្សាទីតាំងរបស់ខ្លួននៅតាមព្រំដែន ដោយអះអាងថា ការរក្សាទីតាំងដដែល និងមិនផ្លាស់ប្តូរកម្លាំង គឺស្របតាមកិច្ចថ្លែងការណ៍រួមដែលភាគីថៃ និងកម្ពុជាបានព្រមព្រៀងគ្នា។ ការលើកឡើងនេះធ្វើឡើងដោយឧត្តមសេនីយ៍ឯកអាកាស Prapas Sonjaidee (ប្រៈផាស់ សុនចៃឌី) អគ្គមេបញ្ជាការរងកងទ័ពអាកាសថៃ និងជាប្រធាន JIC កាលពីថ្ងៃទី៣០ ខែសីហា ឆ្នាំ២០២៦។

លោក Prapas បានអះអាងថា គោលការណ៍សំខាន់នៃកិច្ចថ្លែងការណ៍រួម គឺតម្រូវឱ្យកងកម្លាំងរបស់ភាគីទាំងពីររក្សាទីតាំងដែលខ្លួនកំពុងឈរជើង និងមិនផ្លាស់ទីកងទ័ព ដើម្បីបង្កើតស្ថានភាពថ្មីនៅតាមព្រំដែន។ លោកបានសង្កត់ធ្ងន់ថា ភាគីនីមួយៗមិនគួររុលទៅមុខ បង្កហេតុ ឬបង្កើតការពិតថ្មីនៅលើទីតាំងឡើយ ហើយបានអះអាងថា ភាគីថៃកំពុងអនុវត្តតាមគោលការណ៍នេះ។ លោកក៏បានអំពាវនាវឱ្យការខ្វែងគំនិតគ្នាអំពីការប្រើកម្លាំង ទីតាំងកងទ័ព និងលំដាប់ព្រឹត្តិការណ៍ ត្រូវពិនិត្យតាមភស្តុតាងជាក់ស្តែង។

ការអះអាងរបស់ភាគីថៃនេះ កើតឡើងស្របពេលដែលកម្ពុជាបានចេញលិខិតតវ៉ាជាបន្តបន្ទាប់ ជុំវិញសកម្មភាពរបស់ភាគីថៃនៅតំបន់ព្រំដែន។ តាមសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីថ្ងៃទី២៥ និងថ្ងៃទី២៧ ខែសីហា កម្ពុជាបានតវ៉ាចំពោះការទស្សនកិច្ចរបស់នាយករដ្ឋមន្ត្រីថៃទៅកាន់តំបន់អានសេះ ដោយអះអាងថា ការទស្សនកិច្ចនោះមិនបានជូនដំណឹងដល់ភាគីកម្ពុជាជាមុន។ កម្ពុជាក៏បានលើកឡើងពីទង្វើដែលភាគីថៃបានប្រើប្រាស់គ្រឿងចក្រធុនធ្ងន់ចូលជីកប្រឡាយនៅតំបន់ចូកគ្រួស ក្នុងខេត្តឧត្តរមានជ័យ។

រដ្ឋាភិបាលកម្ពុជាបានបញ្ជាក់ជាថ្មីថា កម្ពុជាមិនទទួលស្គាល់ដាច់ខាតនូវខ្សែបន្ទាត់ព្រំដែន ឬការទាមទារណាមួយជាឯកតោភាគីរបស់ភាគីថៃឡើយ។ កម្ពុជាបានអំពាវនាវឱ្យភាគីថៃបញ្ឈប់សកម្មភាពដែលអាចបង្កើនភាពតានតឹង និងដោះស្រាយបញ្ហាព្រំដែនរវាងប្រទេសទាំងពីរតាមមធ្យោបាយសន្តិវិធី ដោយផ្អែកលើយន្តការទ្វេភាគី កិច្ចព្រមព្រៀងដែលមានស្រាប់ និងការចរចាដើម្បីរកដំណោះស្រាយដែលអាចទទួលយកបានដោយភាគីទាំងពីរ។

ប្រភព៖ The Nation Thailand

https://www.nationthailand.com/news/general/40070461

ក្រសួងការបរទេស

https://www.facebook.com/share/p/19ab7KgtHs/

រាយការណ៍ដោយ៖ The Khmer Today