កូរ៉េខាងត្បូង បញ្ចេញថវិកាសង្គ្រោះបន្ទាន់ជិត ១៩ពាន់លានដុល្លារ ដើម្បីទប់ទល់ ការហក់ឡើងនៃតម្លៃប្រេង ដែ

កូរ៉េខាងត្បូង បញ្ចេញកញ្ចប់ថវិកាសង្គ្រោះបន្ទាន់ជិត ១៩ពាន់លានដុល្លារ ដើម្បីទប់ទល់នឹង ការហក់ឡើងនៃតម្លៃប្រេង ដែលបណ្តាលមកពីវិបត្តិមជ្ឈិមបូព៌ា

[សេអ៊ូល] ៖​​ រដ្ឋាភិបាលកូរ៉េខាងត្បូង គណបក្សកាន់អំណាច និងការិយាល័យប្រធានាធិបតី បានសម្រេច​ជាឯកច្ឆន្ទកាលពីថ្ងៃទី២២ ខែមីនា ក្នុងការដាក់ចេញនូវកញ្ចប់ថវិកាបន្ថែមបន្ទាន់ចំនួន ២៥ ទ្រីលានវ៉ុន (ប្រហែល ១៨,៨ ពាន់លានដុល្លារអាមេរិក)។ វិធានការសារពើពន្ធខ្នាតធំនេះ ធ្វើឡើងក្នុងគោលបំណង​បង្កើត «ខែលការពារសេដ្ឋកិច្ច» ចំពោះមុខការកើនឡើងនៃហានិភ័យភូមិសាស្ត្រនយោបាយនៅ​តំបន់​មជ្ឈិមបូព៌ា ដែលកំពុងគំរាមកំហែងដល់ស្ថិរភាពម៉ាក្រូសេដ្ឋកិច្ចរបស់ប្រទេស។

យុទ្ធសាស្ត្រ «រលកបីជាន់» និងការអន្តរាគមន៍ចំគោលដៅ​ លោកនាយករដ្ឋមន្ត្រី​ Kim Min-seok បានព្រមានពីផលប៉ះពាល់នៃ «រលកបីជាន់» (Triple Wave) ដែលរួមមាន៖ ការហក់ឡើងនៃតម្លៃប្រេង​សកល ការធ្លាក់ថ្លៃនៃប្រាក់វ៉ុន និងសម្ពាធអតិផរណាដែលមិនទាន់ថមថយ។ ដើម្បីឆ្លើយតបនឹងបញ្ហានេះ ថវិកាសង្គ្រោះនឹងត្រូវបែងចែកទៅលើសកម្មភាពអាទិភាពចំនួន ៣៖

ស្ថិរភាពថ្លៃដើម៖ គាំទ្រលើថ្លៃដឹកជញ្ជូន និងថ្លៃប្រេងឥន្ធនៈ ដើម្បីបង្ការការរអាក់រអួលក្នុងខ្សែ​សង្វាក់​ផ្គត់ផ្គង់។

ការការពារក្រុមងាយរងគ្រោះ៖ ផ្តល់ជំនួយហិរញ្ញវត្ថុដល់អាជីវកម្មខ្នាតតូច (SMEs) និងវិស័យ​កសិកម្ម។

ភាពធន់នៃវិស័យនាំចេញ៖ ធានាតុល្យភាពនៃការនាំចេញ ដែលជាឆ្អឹងខ្នងសេដ្ឋកិច្ចជាតិ ក្នុងកំឡុង​ពេល​អស្ថិរភាពតំបន់។

ចំណុចគួរឱ្យកត់សម្គាល់បំផុតនៅក្នុងផែនការនេះ គឺយុទ្ធសាស្ត្រ «មិនបោះផ្សាយសញ្ញាបណ្ណរដ្ឋបន្ថែម»។ រដ្ឋាភិបាលនឹងប្រើប្រាស់ចំណូលពន្ធអតិរេក (Tax Surplus) ដើម្បីបង្គ្រប់កញ្ចប់ថវិកា ដែលជាបច្ចេកទេស​គ្រប់គ្រងហិរញ្ញវត្ថុសាធារណៈ ដើម្បីជៀសវាងការដាក់សម្ពាធលើទីផ្សារប្តូរប្រាក់បរទេស និងរក្សាចំណាត់​ថ្នាក់​ឥណទានជាតិ។

ក្រៅពីយន្តការហិរញ្ញវត្ថុ អាជ្ញាធរកូរ៉េខាងត្បូងនឹងដាក់ចេញនូវវិធានការរឹងត្អឹងក្នុងទីផ្សារថាមពល៖

Price Cap System៖ ការកំណត់តម្លៃខ្ពស់បំផុតលើផលិតផលប្រេងកាត នឹងចាប់ផ្តើមអនុវត្ត​នៅថ្ងៃទី២៧ ខែមីនា។

Contingency Plan៖ រៀបចំផែនការត្រៀមបម្រុងក្នុងករណីមានការបិទច្រកសមុទ្រ Hormuz ដោយសហការជាមួយទីភ្នាក់ងារថាមពលអន្តរជាតិ (IEA) ដើម្បីបញ្ចេញប្រេងបម្រុង និងស្វែងរកប្រភពផ្គត់ផ្គង់ជំនួស។

មន្ត្រីជាន់ខ្ពស់បានចាត់ទុកកញ្ចប់ថវិកានេះថាជា «ថវិកាក្នុងសម័យសង្គ្រាម» និងជា «ម៉ាស៊ីនអុកស៊ីហ្សែន» សម្រាប់សង្គ្រោះសេដ្ឋកិច្ច។ រដ្ឋាភិបាលគ្រោងនឹងដាក់សេចក្តីព្រាងច្បាប់នេះជូនរដ្ឋសភាអនុម័ត នៅក្នុងសម័យប្រជុំពេញអង្គនាដើម​ខែមេសាខាងមុខ ដើម្បីធានាឱ្យបាននូវ «ពេលវេលាមាស» នៃការអន្តរាគមន៍។

ស្របពេលជាមួយគ្នានេះ កូរ៉េខាងត្បូងក៏កំពុងជំរុញការបង្កើតសាជីវកម្មវិនិយោគរដ្ឋថ្មី និងការបើកដំណើរ​ការ​ទីក្រុងរដ្ឋបាលរួមគ្នា Gwangju–South Jeolla នៅខែកក្កដា ដើម្បីពង្រឹងរចនាសម្ព័ន្ធសេដ្ឋកិច្ចក្នុងស្រុកឱ្យកាន់តែរឹងមាំក្នុងរយៈពេលវែង។

ប្រភព៖ https://en.asiatoday.co.kr/view.php?key=20260323000911409#:~:text=South%20Korea's%20ruling%20party%2C%20government,in%20light%20of%20the%20crisis.

រាយការណ៍ដោយ៖ The Khmer Today