អ្នកល្បីលើបណ្តាញសង្គមម្នាក់ បានស្លាប់ក្រោយពេលចាក់សារធាតុពង្រីកប្រដាប់ភេទនៅថៃ

ភ្នំពេញ៖ ថ្ងៃទី៧ ខែកញ្ញា ឆ្នាំ២០២៦ —អ្នកជំនួញ និងអ្នកល្បីលើបណ្តាញសង្គមជនជាតិអង់គ្លេស-នីហ្សេរីយ៉ា លោក Igho «Tiny» Ubiribo (អ៊ីហ្គោ «ថៃនី» អ៊ូប៊ីរីបូ) ដែលគេស្គាល់ថា Denisi (ដេនីស៊ី) ឬ Ego (អេហ្គោ) បានទទួលមរណភាព បន្ទាប់ពីធ្វើនីតិវិធីពង្រីកប្រដាប់ភេទនៅគ្លីនិកមិនបញ្ចេញឈ្មោះមួយក្នុងទីក្រុងបាងកក ប្រទេសថៃ កាលពីខែមីនា។

តាមភស្តុតាងដែលបង្ហាញក្នុងសវនាការស៊ើបអង្កេតការស្លាប់នៅចក្រភពអង់គ្លេស លោក Ubiribo អាយុ៤៣ឆ្នាំ ត្រូវបានចាក់ Hyaluronic Acid (ហាយ៉ាលូរ៉ូនិក អាស៊ីដ) ប្រមាណ៤០មីលីលីត្រ និង Lidocaine (លីដូខេន) ទៅក្នុងប្រដាប់ភេទ។

ក្រោយធ្វើនីតិវិធី លោក Ubiribo និងភរិយា Danielle Simba Allen (ដានីអែល ស៊ីមបា អាឡិន) បានទៅសម្រាក និងបន្តទៅម៉ាស្សា។ នៅទីនោះ លោកបានចាប់ផ្តើមឈឺទ្រូង និងដួលសន្លប់២ដង មុនត្រូវបានបញ្ជូនទៅ មន្ទីរពេទ្យស៊ូខុមវិត។ ដំបូងលោកនៅមានស្មារតី និងអាចឆ្លើយសំណួរគ្រូពេទ្យបាន ខណៈភរិយាបានប្រាប់ក្រុមគ្រូពេទ្យអំពីការចាក់សារធាតុបំពេញថ្មីៗនេះ។

ប៉ុន្តែមុនពេលអាចបញ្ចប់ការថតស្កេន CT Scan លោកបានបាត់ស្មារតី ហើយត្រូវបានធ្វើរោគវិនិច្ឆ័យថាមាន ស្ទះសរសៃឈាមសួត។ ក្រុមគ្រូពេទ្យបានព្យាយាមជួយសង្គ្រោះបេះដូង អស់រយៈពេលជាង១០០នាទី ប៉ុន្តែលោកបានទទួលមរណភាពនៅព្រឹកព្រលឹមថ្ងៃទី៦ ខែមីនា។

ក្រោយមក ការពិនិត្យសាកសពនៅចក្រភពអង់គ្លេសបានរកឃើញសារធាតុកោសិកានៅក្នុងសួត ដែលមានលក្ខណៈស្របនឹង Hyaluronic Acid (ហាយ៉ាលូរ៉ូនិក អាស៊ីដ) ដែលបានប្រើក្នុងនីតិវិធីនេះ។ ក្នុងសវនាការ អ្នកស៊ើបអង្កេតការស្លាប់ Jean Harkin (ហ្សង់ ហាកីន) បានសន្និដ្ឋានថា នីតិវិធីកែសម្ផស្សនេះបានបណ្តាលឱ្យកើតជំងឺស្ទះសរសៃឈាមសួត ដែលនាំឱ្យលោក Ubiribo ស្លាប់។ លោកមានអ្នកតាមដានលើ Instagram ប្រមាណ១៨៥,០០០នាក់ និងត្រូវបានគេស្គាល់តាមរយៈការបង្ហាញពីជីវិតប្រណីត ព្រមទាំងមានអចលនទ្រព្យនៅ Los Angeles (ឡូស អេនជឺឡេស) និង London (ឡុងដ៍)៕

ប្រភព៖ The Guardian

https://guardian.ng/life/influencer-dies-after-penis-enlargement-injection-triggers-fatal-embolism/

Nortern Magazine

https://www.instagram.com/p/Dc6uTUmDVcx/

រាយការណ៍ដោយ៖ The Khmer Today