UNESCO–ICOMOS វាយតម្លៃថា ប្រាសាទព្រះវិហារប្រឈម «គ្រោះថ្នាក់ធ្ងន់ធ្ងរ» ត្រូវការអភិរក្សជាបន្ទាន់

ភ្នំពេញ៖ របាយការណ៍បេសកកម្មរួម UNESCO–ICOMOS ដែលបានចុះពិនិត្យប្រាសាទព្រះវិហារ កាលពីថ្ងៃទី១ ដល់ថ្ងៃទី៦ ខែមីនា ឆ្នាំ២០២៦ បានវាយតម្លៃថា ប្រាសាទព្រះវិហារកំពុងប្រឈមនឹង «គ្រោះថ្នាក់ធ្ងន់ធ្ងរ និងជាក់លាក់» បន្ទាប់ពីទទួលរងផលប៉ះពាល់ពីជម្លោះប្រដាប់អាវុធក្នុងខែកក្កដា និងខែធ្នូ ឆ្នាំ២០២៥។ របាយការណ៍បានបញ្ជាក់ថា ផលប៉ះពាល់ទាំងនេះបានប៉ះពាល់ដល់ភាពគង់វង្ស ភាពដើម និងតម្លៃសកលលេចធ្លោរបស់បេតិកភណ្ឌពិភពលោកមួយនេះ។

តាមរបាយការណ៍ បេសកកម្មបានកត់ត្រាតំបន់ខូចខាតចំនួន ១៤២កន្លែង ពាក់ព័ន្ធនឹងការវាយប្រហារក្នុងខែកក្កដា និង ៤២០កន្លែង ពាក់ព័ន្ធនឹងការវាយប្រហារក្នុងខែធ្នូ ឆ្នាំ២០២៥។ UNESCO–ICOMOS បានពិពណ៌នាថា ទំហំនៃការខូចខាតពីជម្លោះថ្មីនេះមានលក្ខណៈធ្ងន់ធ្ងរ និងមិនអាចប្រៀបធៀបបានជាមួយការខូចខាតពីជម្លោះកន្លងមក។

បេសកកម្មក៏បានកត់សម្គាល់ថា គ្មានតំបន់ណាមួយរួចផុតពីផលប៉ះពាល់ឡើយ ដោយការខូចខាតមិនត្រឹមតែប៉ះពាល់ដល់សំណង់ប្រាសាទប៉ុណ្ណោះទេ ប៉ុន្តែថែមទាំងប៉ះពាល់ដល់ហេដ្ឋារចនាសម្ព័ន្ធ និងឧបករណ៍បម្រើវិស័យទេសចរណ៍នៅក្នុងតំបន់ផងដែរ។

ជាមួយគ្នានេះ UNESCO–ICOMOS បានបញ្ជាក់ពីតម្រូវការឱ្យមាន វិធានការអភិរក្ស និងស្តារឡើងវិញជាបន្ទាន់ ដើម្បីទប់ស្កាត់ការខូចខាតបន្ថែម និងការពារតម្លៃបេតិកភណ្ឌរបស់ប្រាសាទព្រះវិហារ។ ប្រាសាទព្រះវិហារត្រូវបានចុះក្នុងបញ្ជីបេតិកភណ្ឌពិភពលោកតាំងពីឆ្នាំ២០០៨ ហើយការអភិរក្សតំបន់នេះត្រូវបានចាត់ទុកថាមានសារៈសំខាន់ចំពោះការរក្សាតម្លៃវប្បធម៌សម្រាប់មនុស្សជាតិ។

ប្រភព៖ របាយការណ៍បេសកកម្មប្រឹក្សារួម WHC–ICOMOS របស់ UNESCO ស្តីពីប្រាសាទព្រះវិហារ ចុះពិនិត្យថ្ងៃទី១–៦ ខែមីនា ឆ្នាំ២០២៦

https://whc.unesco.org/document/227108

https://whc.unesco.org/en/list/1224/documents/

រាយការណ៍ដោយ៖ The Khmer Today