AOT-KH ចុះផ្ទៀងផ្ទាត់តំបន់ប្រាសាទព្រះវិហារ ឃើញផ្ទាល់ការខូចខាតធ្ងន់ធ្ងរពីការវាយប្រហាររបស់យោធាថៃ

ភ្នំពេញ៖ នៅព្រឹកថ្ងៃព្រហស្បតិ៍ ទី១០ ខែកញ្ញា ឆ្នាំ២០២៦ វេលាម៉ោង ៨:១៥នាទី ក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួលជូនក្រុមអ្នកសង្កេតការណ៍អាស៊ានប្រចាំកម្ពុជា (AOT-KH) ដឹកនាំដោយប្រធានបេសកកម្មក្រុមអ្នកសង្កេតការណ៍អាស៊ានពីសាធារណរដ្ឋហ្វីលីពីន ចុះសង្កេតការណ៍ និងផ្ទៀងផ្ទាត់ស្ថានភាពជាក់ស្តែងនៅតំបន់ប្រាសាទព្រះវិហារ ខេត្តព្រះវិហារ។ ការចុះពិនិត្យនេះមានគោលបំណងសង្កេត ផ្ទៀងផ្ទាត់ និងរាយការណ៍អំពីស្ថានភាពតាមបណ្តោយព្រំដែនកម្ពុជា-ថៃ និងការខូចខាតនៅតំបន់ប្រាសាទព្រះវិហារ ដែលជាបេតិកភណ្ឌពិភពលោក។

តាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិកម្ពុជា ក្រុម AOT-KH បានចុះពិនិត្យទីតាំងជាក់ស្តែង និងបានឃើញដោយផ្ទាល់នូវការខូចខាតធ្ងន់ធ្ងរដែលកម្ពុជាអះអាងថា បណ្តាលមកពីការវាយប្រហាររបស់យោធាថៃ។ ក្រសួងការពារជាតិបញ្ជាក់ថា សំណង់ និងស្ថាបត្យកម្មសំខាន់ៗមួយចំនួននៃប្រាសាទព្រះវិហារ បានរងផលប៉ះពាល់ពីការផ្លោងគ្រាប់ធុនធ្ងន់ និងការទម្លាក់គ្រាប់បែកពីលើអាកាស ដែលកម្ពុជាអះអាងថា បានវាយសំដៅមកលើតំបន់ប្រាសាទ។

ក្រសួងការពារជាតិកម្ពុជាក៏បានអះអាងថា បន្ទាប់ពីបទឈប់បាញ់ចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥ យោធាថៃនៅតែបន្តសកម្មភាពដែលកម្ពុជាចាត់ទុកថាជាការទន្ទ្រានលើដែនអធិបតេយ្យរបស់ខ្លួន តាមរយៈការដាក់កុងតឺន័រ រាយបន្លាលួស ជីកប្រឡាយ ធ្វើលេណដ្ឋាន និងសាងសង់ផ្លូវបេតុងចូលកាន់តែជិតតំបន់ប្រាសាទព្រះវិហារ។ កម្ពុជាចាត់ទុកសកម្មភាពទាំងនេះថា ជាការរំលោភលើច្បាប់អន្តរជាតិ និងកិច្ចព្រមព្រៀងដែលមានស្រាប់រវាងប្រទេសទាំងពីរ។

ជាមួយគ្នានេះ កម្ពុជាបានបញ្ជាក់ថា ខ្លួននៅតែគាំទ្រយ៉ាងពេញទំហឹងចំពោះ AOT និងសង្កត់ធ្ងន់លើសារៈសំខាន់នៃការពង្រឹងតួនាទីរបស់ក្រុមអ្នកសង្កេតការណ៍អាស៊ាន ក្នុងការចុះពិនិត្យដោយផ្ទាល់នៅទីតាំងជាក់ស្តែង ដើម្បីផ្ទៀងផ្ទាត់ និងធានាការអនុវត្តបទឈប់បាញ់ឱ្យបានពេញលេញ និងមានប្រសិទ្ធភាព។ កម្ពុជាបញ្ជាក់ថា ការចុះពិនិត្យ និងរាយការណ៍ដោយផ្អែកលើស្ថានភាពជាក់ស្តែង នឹងរួមចំណែកដល់ការលើកកម្ពស់តម្លាភាព គណនេយ្យភាព និងការកសាងទំនុកចិត្ត សំដៅធានាសន្តិភាព និងស្ថិរភាពយូរអង្វែងនៅតាមព្រំដែនកម្ពុជា-ថៃ៕

ប្រភព៖ ក្រសួងការពារជាតិ

https://www.facebook.com/share/p/1FLeFZ83kR/

រាយការណ៍ដោយ៖ The Khmer Today