«ទង្វើមិនស្របសម្ដី» ថៃចោទកម្ពុជាមុខ UNCLOS៖ សួរថា តើកម្ពុជាគោរពច្បាប់អន្តរជាតិត្រង់ណា?

ភ្នំពេញ៖ថ្ងៃទី១៦ ខែកញ្ញា ឆ្នាំ២០២៦- រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ បានលើកឡើងអំពីការគោរពច្បាប់អន្តរជាតិរបស់កម្ពុជា នៅក្នុងសេចក្តីថ្លែងការណ៍បើកកិច្ចប្រជុំគណៈកម្មការផ្សះផ្សា ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) នៅប្រទេសសិង្ហបុរី កាលពីថ្ងៃទី១៥ ខែកញ្ញា ឆ្នាំ២០២៦។ លោកបានអះអាងថា កម្ពុជាតែងលើកឡើងថាខ្លួនគោរពច្បាប់អន្តរជាតិ ប៉ុន្តែថៃចាត់ទុកថា សកម្មភាពមួយចំនួនរបស់កម្ពុជាមិនស្របនឹងការអះអាងនេះ ហើយបានលើកជាសំណួរថា «តើការគោរពច្បាប់អន្តរជាតិនៅឯណា?»។

លោក ស៊ីហាសាក់ បានលើកឡើងពីបញ្ហាមួយចំនួនដែលថៃចោទប្រកាន់កម្ពុជា រួមមានការបញ្ចេញខ្សែសន្ទនាតាមទូរស័ព្ទឯកជនរវាងមេដឹកនាំ ការបាញ់រ៉ុក្កែតដែលថៃអះអាងថាបណ្តាលឱ្យប្រជាពលរដ្ឋថៃស្លាប់ និងករណីមីនដែលថៃអះអាងថាត្រូវបានដាក់ដោយកម្ពុជា។ លោកបានភ្ជាប់បញ្ហាទាំងនេះទៅនឹងការអះអាងរបស់ថៃថា ខ្លួនប្រកាន់ខ្ជាប់នូវច្បាប់អន្តរជាតិ និងគាំទ្រការដោះស្រាយបញ្ហាតាមរយៈការចរចា និងដំណើរការផ្សះផ្សា។

ទន្ទឹមនឹងការលើកឡើងរបស់ថៃនេះ តាមសេចក្តីជូនដំណឹងរបស់ក្រសួងការពារជាតិ និងក្រសួងការបរទេសកម្ពុជាកន្លងមក កងកម្លាំងថៃបានធ្វើសកម្មភាពជាបន្តបន្ទាប់នៅតាមតំបន់ព្រំដែន ដែលបង្កើនភាពតានតឹង ដូចជា ការរាយបន្លាលួស ការដាក់របាំង និងទូកុងតឺន័រ ការឈូសឆាយដី ការរុះរើផ្ទះសម្បែង និងការកសាងសំណង់ថ្មីៗនៅតំបន់ដែលកម្ពុជាចាត់ទុកថាស្ថិតក្នុងទឹកដីរបស់ខ្លួន។ ហើយសកម្មភាពមួយចំនួនបានប៉ះពាល់ដល់ប្រជាពលរដ្ឋ និងរារាំងការវិលត្រឡប់ទៅកាន់លំនៅឋានរបស់ពួកគេ។

ក្នុងបរិបទនេះ ការលើកឡើងរបស់ភាគីថៃអំពីការគោរពច្បាប់អន្តរជាតិ កំពុងត្រូវបានដាក់ឱ្យពិនិត្យជាមួយសកម្មភាពដែលភាគីកម្ពុជាបានរាយការណ៍នៅតាមព្រំដែន ខណៈដំណើរការផ្សះផ្សា UNCLOS ផ្តោតលើការកំណត់ព្រំដែនសមុទ្ររវាងប្រទេសទាំងពីរនៅឈូងសមុទ្រថៃ។ ភាគីថៃបានបញ្ជាក់ថា ខ្លួនយកខ្សែព្រំដែនសមុទ្រឆ្នាំ១៩៧៣ជាមូលដ្ឋាន និងបដិសេធខ្សែបន្ទាត់ទាមទាររបស់កម្ពុជាឆ្នាំ១៩៧២ ខណៈកម្ពុជាបានដាក់ជម្រើសជាច្រើនសម្រាប់ស្វែងរកដំណោះស្រាយដោយសន្តិវិធី និងផ្អែកលើច្បាប់អន្តរជាតិ។

ប្រភព៖ សន្ទរកថាថ្លែងក្នុងកិច្ចប្រជុំគណៈកម្មការផ្សះផ្សា UNCLOS

https://www.facebook.com/share/v/19at6NWD4j/

រាយការណ៍ដោយ៖ The Khmer Today