កម្ពុជាឆ្លើយតបការចោទប្រកាន់របស់ថៃនៅ UNGA និងបញ្ជាក់ថា ការអះអាងឯកតោភាគីមិនអាចបង្កើតព្រំដែនបានទេ

ភ្នំពេញ ថ្ងៃទី៣០ ខែកញ្ញា ឆ្នាំ២០២៦៖ កម្ពុជាបានឆ្លើយតបចំពោះការលើកឡើងរបស់លោក ឈើតឆាយ ឆៃវីវិវ័ត (Cherdchai Chaivaivid) ឯកអគ្គរាជទូត និងជាតំណាងអចិន្ត្រៃយ៍ថៃប្រចាំអង្គការសហប្រជាជាតិ ដែលបានប្រើសិទ្ធិឆ្លើយតបនៅមហាសន្និបាតអង្គការសហប្រជាជាតិ លើកទី៨១ កាលពីថ្ងៃទី២៨ ខែកញ្ញា ឆ្នាំ២០២៦។ ភាគីថៃបានអះអាងថា ប្រជាពលរដ្ឋកម្ពុជាដែលត្រូវបានហៅថា «ជនភៀសខ្លួនក្នុងប្រទេស» គឺជាពលរដ្ឋខ្មែរដែលរស់នៅក្នុងតំបន់ដែលថៃបានបើកជាមណ្ឌលស្នាក់នៅបណ្តោះអាសន្នតាំងពីទសវត្សរ៍ឆ្នាំ១៩៧០ ហើយការមិនវិលត្រឡប់របស់ពួកគេត្រូវបានថៃចាត់ទុកថាជាការរំលោភលើទឹកដីថៃ។

ជាការឆ្លើយតប លោក ទូច សុឃៈ អ្នកនាំពាក្យរងក្រសួងមហាផ្ទៃកម្ពុជា បានបដិសេធការអះអាងនេះ និងបញ្ជាក់ថា ការអះអាងឯកតោភាគីមិនអាចបង្កើតខ្សែព្រំដែន ឬសិទ្ធិអធិបតេយ្យតាមផ្លូវច្បាប់បានឡើយ។ លោកបានលើកឡើងថា បញ្ហាព្រំដែនគួរត្រូវបានផ្ទៀងផ្ទាត់តាមឯកសារគតិយុត្ត ផែនទី និងយន្តការដែលប្រទេសទាំងពីរបានព្រមព្រៀង ជាពិសេសតាមរយៈគណៈកម្មការចម្រុះខណ្ឌសីមាព្រំដែនគោល (JBC)។ កម្ពុជាក៏បានអះអាងថា ការបង្កើតស្ថានភាពថ្មីនៅលើដី មិនអាចជំនួសដំណើរការវាស់វែង និងខណ្ឌសីមាតាមច្បាប់បានទេ។

ភាគីកម្ពុជាបានរំលឹកថា សេចក្តីប្រកាសរួម GBC ថ្ងៃទី២៧ ខែធ្នូ ឆ្នាំ២០២៥ មានការកំណត់ឱ្យភាគីទាំងពីររក្សាទីតាំងកម្លាំង និងអនុវត្តកិច្ចព្រមព្រៀងដែលមានស្រាប់ ខណៈកម្ពុជាបានអំពាវនាវឱ្យ JBC ចាប់ផ្តើមការងារស្ទង់វាស់ និងខណ្ឌសីមាព្រំដែនឡើងវិញឱ្យបានឆាប់។ កាលពីថ្ងៃទី២៩ ខែកញ្ញា លេខាធិការដ្ឋាន RBC របស់កម្ពុជា និងថៃក៏បានជួបប្រជុំក្រៅផ្លូវការនៅច្រកជាំ-សាង៉ាំ ដើម្បីពិភាក្សាអំពីការអនុវត្តកិច្ចព្រមព្រៀងទ្វេភាគី និងសេចក្តីប្រកាសរួម GBC ផងដែរ។

ទន្ទឹមនឹងនេះ ភាគីថៃបានបញ្ជាក់ថា ខ្លួននៅតែប្រកាន់ខ្ជាប់បទឈប់បាញ់ និងសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ហើយចាត់ទុកការចរចា និងការទូតជាជម្រើសដំបូងសម្រាប់ដោះស្រាយបញ្ហាជាមួយកម្ពុជា។ ចំណែកភាគីកម្ពុជា បានបញ្ជាក់ថា ខ្លួននឹងបន្តដោះស្រាយបញ្ហាព្រំដែនតាមមធ្យោបាយសន្តិវិធី ដោយផ្អែកលើច្បាប់អន្តរជាតិ និងកិច្ចព្រមព្រៀងដែលមានស្រាប់ ព្រមទាំងបន្តជំរុញការងារ JBC ដើម្បីស្វែងរកដំណោះស្រាយលើបញ្ហាព្រំដែនដែលនៅសេសសល់។

ប្រភព៖ អគ្គនាយកដ្ឋានអន្តោប្រវេសន៍

https://www.facebook.com/share/p/1Dgaw9D9gB/

The standard

https://www.facebook.com/share/p/1B4XX5cU6j/

រាយការណ៍ដោយ ៖ The Khmer Today