ក្រុមចោរ១១នាក់ត្រូវសមត្ថកិច្ចប៉ោយប៉ែតបង្ក្រាប ដកហូតម៉ូតូ២៥គ្រឿង ពាក់ព័ន្ធបទល្មើសលួច និងទទួលផលចោរកម្ម

ភ្នំពេញ ថ្ងៃទី១ ខែតុលា ឆ្នាំ២០២៦៖ កម្លាំងអធិការដ្ឋាននគរបាលក្រុងប៉ោយប៉ែត បានបង្ក្រាបក្រុមជនសង្ស័យពាក់ព័ន្ធបទល្មើសលួច និងទទួលផលចោរកម្ម ដោយឃាត់ខ្លួនបានចំនួន១១នាក់ ក្នុងនោះមានស្ត្រីម្នាក់ និងដកហូតម៉ូតូចំនួន២៥គ្រឿង។ ប្រតិបត្តិការនេះផ្តើមចេញពីពាក្យបណ្ដឹងរបស់ប្រជាពលរដ្ឋ២នាក់ កាលពីថ្ងៃទី១៣ ខែកញ្ញា ឆ្នាំ២០២៦ ករណីបាត់ម៉ូតូ២គ្រឿង ដែលមានកាមេរ៉ាសុវត្ថិភាពជាភស្តុតាង។

ប្រតិបត្តិការស្រាវជ្រាវនេះធ្វើឡើងក្រោមការបញ្ជាផ្ទាល់របស់លោកឧត្តមសេនីយ៍ត្រី សឿម សារិទ្ធ ស្នងការនគរបាលខេត្តបន្ទាយមានជ័យ និងដឹកនាំដោយលោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត។ តាមការស្រាវជ្រាវរហូតដល់ថ្ងៃទី២៥ ខែកញ្ញា ឆ្នាំ២០២៦ សមត្ថកិច្ចបានឃាត់ខ្លួនជនសង្ស័យ១១នាក់ ក្នុងនោះ៧នាក់ពាក់ព័ន្ធនឹងសកម្មភាពលួចម៉ូតូ និង៤នាក់ទៀតពាក់ព័ន្ធនឹងការទទួលផលចោរកម្ម ឬទិញម៉ូតូដែលគ្មានឯកសារត្រឹមត្រូវ ខណៈជនសង្ស័យ២នាក់ទៀតកំពុងរត់គេចខ្លួន។

ក្នុងប្រតិបត្តិការនេះ សមត្ថកិច្ចបានដកហូតម៉ូតូសរុប២៥គ្រឿង។ ក្នុងចំណោមម៉ូតូទាំងនេះ មាន៣គ្រឿងត្រូវបានផ្ទៀងផ្ទាត់ឃើញថាត្រូវនឹងម៉ូតូក្នុងពាក្យបណ្ដឹង និងបានរៀបចំប្រគល់ជូនម្ចាស់ដើមវិញតាមនីតិវិធី ដោយមិនមានការទារប្រាក់ ឬកម្រៃសេវាឡើយ។ អធិការដ្ឋាននគរបាលក្រុងប៉ោយប៉ែត បានអំពាវនាវដល់ប្រជាពលរដ្ឋដែលធ្លាប់បាត់ម៉ូតូ សូមអញ្ជើញមកផ្ទៀងផ្ទាត់ម៉ូតូដែលសមត្ថកិច្ចដកហូតបាន ដោយភ្ជាប់កាតគ្រីច្បាប់ដើម អត្តសញ្ញាណប័ណ្ណសញ្ជាតិខ្មែរ និងបង្កាន់ដៃ ឬពាក្យបណ្ដឹងបាត់ម៉ូតូ ប្រសិនបើមាន។

បច្ចុប្បន្ន ជនសង្ស័យទាំង១១នាក់ ត្រូវបានកសាងសំណុំរឿងបញ្ជូនទៅការិយាល័យជំនាញ ដើម្បីបន្តនីតិវិធីច្បាប់ ខណៈម៉ូតូដែលនៅសល់កំពុងរង់ចាំការផ្ទៀងផ្ទាត់ពីម្ចាស់ដើម។ សមត្ថកិច្ចក៏បន្តស្រាវជ្រាវតាមចាប់ខ្លួនជនសង្ស័យ២នាក់ទៀតដែលកំពុងរត់គេចខ្លួន និងបញ្ជាក់ថា ប្រជាពលរដ្ឋដែលមានឯកសារបញ្ជាក់ពីភាពជាម្ចាស់ម៉ូតូ អាចមកផ្ទៀងផ្ទាត់ និងទទួលម៉ូតូរបស់ខ្លួនត្រឡប់ទៅវិញតាមនីតិវិធី៕

ប្រភព៖ អធិការដ្ឋាននគរបាល ក្រុងប៉ោយប៉ែត

https://www.facebook.com/share/p/1CBdk6BtZi/

រាយការណ៍ដោយ៖ The Khmer Today