អាជ្ញាធរជាតិអប្សរាចាប់ផ្ដើមនាំព្រះសិរចម្លាក់ទេពត្រឡប់ទៅកាន់ខ្លោងទ្វារជ័យ អង្គរធំ ដើម្បីស្ដារសោភណភាពអង្គរធំ

ភ្នំពេញ៖ អាជ្ញាធរជាតិអប្សរា បានចាប់ផ្ដើមនាំព្រះសិរចម្លាក់ទេពត្រឡប់ទៅកាន់ទីតាំងដើមវិញ ដោយបានរៀបចំពិធីប្រោះព្រំ ភ្ជាប់ព្រះសិរ និងបើកព្រះនេត្រចម្លាក់ទេពចំនួន២ នៅខ្លោងទ្វារជ័យ នៃក្រុងអង្គរធំ នាព្រឹកថ្ងៃទី១ ខែតុលា ឆ្នាំ២០២៦។ ពិធីនេះធ្វើឡើងក្រោមយុទ្ធនាការ «ព្រលឹងត្រឡប់មកទីតាំងដើមវិញ» ក្នុងគោលបំណងស្ដារឡើងវិញនូវចម្លាក់នៅខ្លោងទ្វារជ័យ និងលើកកម្ពស់សោភណភាពនៃបេតិកភណ្ឌអង្គរ។

តាមក្រសួងវប្បធម៌ និងវិចិត្រសិល្បៈ នៅតាមខ្លោងទ្វារនីមួយៗនៃក្រុងអង្គរធំ មានចម្លាក់អ្នកយាមចំនួន១០៨ ក្នុងនោះមានអសុរៈ៥៤ និងទេព៥៤ ដែលជាតំណាងឱ្យឈុតឆាក «កូរសមុទ្រទឹកដោះ»។ ចម្លាក់ទាំងនេះត្រូវបានរៀបចំជាផ្នែកសំខាន់នៃស្ថាបត្យកម្មក្រុងអង្គរធំ ដែលកសាងឡើងក្នុងរជ្ជកាលព្រះបាទជ័យវរ្ម័នទី៧ និងមានតម្លៃសំខាន់ទាំងផ្នែកប្រវត្តិសាស្ត្រ សិល្បៈ និងសាសនា។

ជាមួយគ្នានេះ អាជ្ញាធរជាតិអប្សរា កំពុងស្វែងរក និងប្រមូលព្រះសិរចម្លាក់ទេព និងអសុរៈដែលជាចម្លាក់ដើម ដើម្បីយកមកជួសជុល និងភ្ជាប់ត្រឡប់ទៅកាន់ទីតាំងដើមវិញ។ កាលពីខែកក្កដា ឆ្នាំ២០២៥ ក្បាលចម្លាក់ថ្មភក់យ៉ាងតិច៤១ ត្រូវបានប្រមូលពីឃ្លាំងអភិរក្សអង្គរ ដែលដើមឡើយជាផ្នែកនៃក្បួនចម្លាក់នៅខ្លោងទ្វារជ័យ ខណៈចម្លាក់មួយចំនួនទៀតត្រូវបានរកឃើញនៅក្រោមដីតាមបណ្តោយផ្លូវចូលខ្លោងទ្វារ។

តាមផែនការរបស់អាជ្ញាធរជាតិអប្សរា ការស្វែងរក និងប្រមូលព្រះសិរចម្លាក់ដើម នឹងធ្វើឡើងសម្រាប់ខ្លោងទ្វារទាំង៥ នៃក្រុងអង្គរធំ ដែលមានចំនួនសរុបប្រមាណ៥៤០ក្បាល។ ការងារនេះមានគោលបំណងនាំយកចម្លាក់ត្រឡប់ទៅកាន់ទីតាំងដើម ដើម្បីស្ដាររូបរាងដើម និងសោភណភាពនៃខ្លោងទ្វារអង្គរធំ ព្រមទាំងរួមចំណែកក្នុងការអភិរក្សបេតិកភណ្ឌសម្រាប់មនុស្សជំនាន់ក្រោយ។

ប្រភព៖ ទំព័រផ្លូវការលោក Andy Brouwer

https://www.facebook.com/share/p/1J17tvhNgm/?mibextid=wwXIfr

ក្រសួងវប្បធម៌ និងវិចិត្រសិល្បៈ

https://www.facebook.com/share/p/1NGq8KMC8q/?mibextid=wwXIfr

រាយការណ៍ដោយ៖ The Khmer Today