ប្រជាពលរដ្ឋសម្រុកប្រើសេវារថយន្តក្រុងឥតគិតថ្លៃ ដើម្បីត្រឡប់ទៅស្រុកកំណើតក្នុងឱកាសបុណ្យភ្ជុំបិណ្ឌ

ភ្នំពេញ ថ្ងៃទី៩ ខែតុលា ឆ្នាំ២០២៦៖ ប្រជាពលរដ្ឋជាច្រើនបាននាំគ្នាមកប្រើប្រាស់សេវារថយន្តក្រុងសាធារណៈដោយឥតគិតថ្លៃ ដែលចាប់ផ្ដើមដំណើរការនៅព្រឹកថ្ងៃទី៩ ខែតុលា ឆ្នាំ២០២៦ ដើម្បីធ្វើដំណើរទៅកាន់គោលដៅនានា និងត្រឡប់ទៅស្រុកកំណើតជួបជុំគ្រួសារក្នុងឱកាសពិធីបុណ្យភ្ជុំបិណ្ឌ។ សេវាដឹកជញ្ជូននេះត្រូវបានរៀបចំឡើងដោយរដ្ឋបាលរាជធានីភ្នំពេញ ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងអំឡុងពេលពិធីបុណ្យប្រពៃណីជាតិ។

នៅថ្ងៃដំបូងនៃការដឹកជញ្ជូន ប្រជាពលរដ្ឋជាច្រើនបានមកទទួលសេវារថយន្តក្រុងដោយទឹកមុខញញឹម និងរីករាយ ខណៈរថយន្តក្រុងបានចាប់ផ្ដើមចេញដំណើរទៅតាមគោលដៅដែលបានរៀបចំ។ ការផ្ដល់សេវានេះជួយបង្កើនភាពងាយស្រួលដល់អ្នកដំណើរ ជាពិសេសអ្នកដែលមានបំណងធ្វើដំណើរទៅស្រុកកំណើត ដើម្បីជួបជុំសាច់ញាតិ និងចូលរួមពិធីបុណ្យភ្ជុំបិណ្ឌ។

ក្នុងឱកាសនេះ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញមកជូនដំណើរប្រជាពលរដ្ឋដែលប្រើប្រាស់សេវារថយន្តក្រុងសាធារណៈដោយឥតគិតថ្លៃ នៅព្រឹកថ្ងៃទី៩ ខែតុលា ឆ្នាំ២០២៦ផងដែរ។

ការដាក់ឱ្យប្រើប្រាស់រថយន្តក្រុងដោយឥតគិតថ្លៃនេះ គឺជាការជួយសម្រាលបន្ទុកចំណាយធ្វើដំណើររបស់ប្រជាពលរដ្ឋ ជាពិសេសកម្មករ កម្មការិនី និងគ្រួសារដែលមានជីវភាពមធ្យម និងខ្វះខាត ដោយអាចសន្សំប្រាក់សម្រាប់ចំណាយលើតម្រូវការផ្សេងៗ និងការធ្វើបុណ្យនៅស្រុកកំណើត។ រដ្ឋបាលរាជធានីភ្នំពេញក៏បានអំពាវនាវឱ្យប្រជាពលរដ្ឋប្រើប្រាស់សេវាដឹកជញ្ជូនសាធារណៈនេះ និងសូមឱ្យការធ្វើដំណើររបស់បងប្អូនទាំងអស់ប្រកបដោយសុវត្ថិភាព និងផាសុកភាព។

ប្រភព៖ រដ្ឋាករស្វយ័តដឹកជញ្ជូនសាធារណៈរថយន្តក្រុង City Bus រាជធានីភ្នំពេញ

https://www.facebook.com/share/p/14rK6RGENBQ/

ឯកឧត្តម ឃួង ស្រេង

https://www.facebook.com/share/p/19RimTfzAm/

រាយការណ៍ដោយ៖ The Khmer Today