សមណសិស្ស៦អង្គជាប់ជ័យលាភីសិស្សពូកែថ្នាក់ជាតិ ផ្នែកភាសាបាលី-សំស្ក្រឹត ឆ្នាំ២០២៦

ភ្នំពេញ ថ្ងៃទី២៣ ខែតុលា ឆ្នាំ២០២៦៖ សមណសិស្សចំនួន៦អង្គ ទទួលបានជ័យលាភីលេខ១ ដល់លេខ៣ ក្នុងការប្រឡងសិស្សពូកែទូទាំងប្រទេស ផ្នែកភាសាបាលី-សំស្ក្រឹត ឆ្នាំ២០២៦ សម្រាប់កម្រិតពុទ្ធិកមធ្យមសិក្សាបឋមភូមិ និងទុតិយភូមិ បន្ទាប់ពីការប្រកួតប្រជែងដែលរៀបចំឡើងដោយអគ្គាធិការដ្ឋានពុទ្ធិកសិក្សាជាតិ នៃក្រសួងធម្មការ និងសាសនា។

យោងតាមព័ត៌មានដែលផ្សព្វផ្សាយដោយអគ្គាធិការដ្ឋានពុទ្ធិកសិក្សាជាតិ ការប្រឡងនេះបានប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៦ ដោយមានបេក្ខសមណៈ និងបេក្ខជនសរុប១៩៨អង្គ/នាក់ ចូលរួមប្រឡងផ្នែកភាសាបាលី-សំស្ក្រឹត។ ក្នុងនោះ មាន១៤៧អង្គ/នាក់ ជាបេក្ខជនកម្រិតពុទ្ធិកមធ្យមសិក្សាបឋមភូមិ និង៥១អង្គ/នាក់ ជាបេក្ខជនកម្រិតពុទ្ធិកមធ្យមសិក្សាទុតិយភូមិ។

សម្រាប់កម្រិតពុទ្ធិកមធ្យមសិក្សាបឋមភូមិ ជ័យលាភីលេខ១ បានទៅលើសមណសិស្ស សុខ សុវណ្ណបញ្ញា មកពីពុទ្ធិកវិទ្យាល័យ អ៊ឹង ធួង ខេត្តបាត់ដំបង។ ជ័យលាភីលេខ២ គឺសមណសិស្ស ស្រស់ ឧសភា មកពីពុទ្ធិកវិទ្យាល័យ ជម្ពូវ័នសែនជ័យ រាជធានីភ្នំពេញ ខណៈជ័យលាភីលេខ៣ បានទៅលើសមណសិស្ស សុធានី សីហសូនូ មកពីពុទ្ធិកអនុវិទ្យាល័យសម្តេចអគ្គមហាសេនាបតីតេជោ ហ៊ុន សែន ក្រុងច្បារមន។

ចំណែកកម្រិតពុទ្ធិកមធ្យមសិក្សាទុតិយភូមិ ជ័យលាភីលេខ១ បានទៅលើសមណសិស្ស រី ម៉ាលី មកពីពុទ្ធិកវិទ្យាល័យ ជម្ពូវ័នសែនជ័យ រាជធានីភ្នំពេញ។ ជ័យលាភីលេខ២ គឺសមណសិស្ស គុណ ចាន់វៃ មកពីពុទ្ធិកវិទ្យាល័យ រាជបូណ៌ ខេត្តសៀមរាប និងជ័យលាភីលេខ៣ គឺសមណសិស្ស យ៉ាន វិអ៊ា មកពីពុទ្ធិកវិទ្យាល័យ ជម្ពូវ័នសែនជ័យ រាជធានីភ្នំពេញ។

ក្រៅពីការប្រឡងផ្នែកភាសាបាលី-សំស្ក្រឹត ក៏មានការប្រឡងសូត្របាតិមោក្ខ ដោយមានបេក្ខសមណៈចំនួន៦៦អង្គចូលរួមប្រកួតប្រជែង។ តាមលទ្ធផលដែលបានផ្សព្វផ្សាយ ជ័យលាភីបាតិមោក្ខកោវិទទាំង៥រូប រួមមាន៖ លេខ១ ហ៊ុន ឆេងប៉ាវ មកពីខេត្តកំពង់ឆ្នាំង លេខ២ វី សម្ផស្ស មកពីខេត្តសៀមរាប លេខ៣ មើយ សុខនីន មកពីខេត្តក្រចេះ លេខ៤ ពុំ ភក្តី មកពីខេត្តកណ្តាល និងលេខ៥ យ័ញ វូបាវ មកពីខេត្តអានយ៉ាង។

ការប្រឡងនេះមានគោលបំណងជ្រើសរើសសមណសិស្ស និងបេក្ខសមណៈដែលមានសមត្ថភាពពូកែផ្នែកភាសាបាលី-សំស្ក្រឹត និងសូត្របាតិមោក្ខ ព្រមទាំងលើកកម្ពស់ការសិក្សាព្រះពុទ្ធសាសនានៅកម្ពុជា។

ប្រភព៖ អគ្គាធិការដ្ឋានពុទ្ធិកសិក្សាជាតិ

https://www.facebook.com/share/p/1C8qdPp96N/?mibextid=wwXIfr

រាយការណ៍ដោយ៖ The Khmer Today