ខេត្តសៀមរាបអបអរសាទរការរស់ឡើងវិញនៃសិប្បកម្មខ្មែរ ជាមួយ “ពិធីបុណ្យផ្កាឈូក” ដំណាលគ្នា នៃកិច្ចប្រជុំកំពូលហ្វ្រង់កូហ្វូនី

សៀមរាប – ខណៈពេលដែលរាជធានីភ្នំពេញកំពុងទទួលស្វាគមន៍កិច្ចប្រជុំកំពូលហ្វ្រង់កូហ្វូនីលើកទី២០ ខេត្តសៀមរាបក៏កំពុងផ្តល់ជូនគណៈប្រតិភូ និងប្រជាពលរដ្ឋនូវការអបអរសាទរដ៏វិសេសវិសាលមួយបែបផ្សេងទៀត។ ចាប់ពីថ្ងៃទី៧ ដល់ថ្ងៃទី២៥ ខែវិច្ឆិកា កសិដ្ឋានសូត្រផ្កាឈូក (Lotus Silk Farm) នឹងបើកទ្វារវាលបឹងឈូករបស់ខ្លួនសម្រាប់ “ពិធីបុណ្យផ្កាឈូក” ដែលជាព្រឹត្តិការណ៍រយៈពេល ១៩ ថ្ងៃ ពោរពេញទៅដោយស្នាដៃសិប្បកម្ម តន្ត្រី និងម្ហូបអាហារ ជាមួយនឹងការចូលទស្សនាដោយឥតគិតថ្លៃជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៨:០០ យប់។

មហោស្រពនេះប្រមូលផ្តុំជាលើកដំបូងនូវស្ថាប័នសិប្បកម្មល្បីៗចំនួនបីនៅខេត្តសៀមរាប ដែលកើតចេញពីការរួមបញ្ចូលគ្នារវាងចំណេះដឹងបច្ចេកទេសរបស់បារាំង និងប្រពៃណីខ្មែរ។ កសិដ្ឋាន Lotus Silk Farm ដែលត្រូវបានបង្កើតឡើងក្នុងឆ្នាំ២០០៤ ដោយលោក Awen Delaval ជនជាតិបារាំងដើមកំណើតនៅតំបន់ប្រឺតាញ (Breton) គឺជាក្រុមហ៊ុនតែមួយគត់ ក្នុងពិភពលោកដែលកែច្នៃរុក្ខជាតិឈូកតាំងពីដើមដល់ចប់ (ពី A ដល់ Z) ចាប់ពីសរសៃទងផ្កា រហូតដល់ផ្កា គ្រាប់ និងស្លឹកឈូក។

ក្នុងនាមជាម្ចាស់ជ័យលាភីពានរង្វាន់ឆ្នើមរបស់អង្គការយូណេស្កូ (UNESCO Award of Excellence) និងទទួលបានការគាំទ្រដ៏ខ្ពង់ខ្ពស់ពីព្រះករុណា ព្រះបាទសម្តេច ព្រះបរមនាថ នរោត្តម សីហមុនី កសិដ្ឋាននេះបាននិងកំពុងទ្រទ្រង់ដល់សិប្បករជាង ២០០ នាក់ ដែលភាគច្រើនជាស្ត្រីមកពីភូមិក្បែរខាង ព្រមទាំងផ្គត់ផ្គង់ក្រណាត់សរសៃឈូកទៅឱ្យក្រុមហ៊ុន Loro Piana នៃសម្ព័ន្ធ LVMH ផងដែរ។ ចំណែកឯ សិប្បកម្មអង្គរ (Artisans d'Angkor) ដែលជាអ្នកបន្តវេនពីសាលាបណ្តុះបណ្តាលវិជ្ជាជីវៈ (Chantiers-Écoles) ដែលបានស្តារសិប្បកម្មខ្មែរឡើងវិញក្នុងឆ្នាំ១៩៩២ នឹងចូលរួមបង្ហាញពីការឆ្លាក់ឈើ និងចម្លាក់ថ្ម។ រីឯ Studio Stocker ដែលជារោងជាងរបស់មេជាងគំនូរម្រ័ក្សណ៍លោក Eric Stocker នឹងរៀបចំសិក្ខាសាលាឥតគិតថ្លៃស្តីពីការធ្វើគំនូរម្រ័ក្សណ៍ពីសម្បកស៊ុត និងស្លាបសត្វល្អិត/កំភេម ដែលមិនធ្លាប់មានការបង្ហាញជាសាធារណៈពីមុនមកទេនៅក្នុងប្រទេសកម្ពុជា។

ជារៀងរាល់ថ្ងៃ កម្មវិធីនឹងចាប់ផ្តើមដោយពិធីសូត្រមន្តប្រោះព្រំពីព្រះសង្ឃនៅក្បែរបឹងឈូកនាវេលាម៉ោង ១០:០០ ព្រឹក បន្ទាប់មកមានការសម្តែងរបាំអប្សរា និងតន្ត្រីបុរាណខ្មែរ។ សិក្ខាសាលាឥតគិតថ្លៃជាច្រើនកំពុងរង់ចាំស្វាគមន៍ទាំងកុមារ និងមនុស្សពេញវ័យ រួមមាន៖ ការឆ្លាក់ចម្លាក់ ការស្ទូចត្រី ការធ្វើមួក ការត្បាញកំប្លោក និងស្លឹកត្នោត ព្រមទាំងការចាក់ក្រណាត់/អំបោះ។ ភោជនីយដ្ឋាន The Sacred Garden នឹងបម្រើជូននូវនំចំណីបែបបារាំងដែលផ្សំឡើងពីផ្កាឈូក ការ៉េមផ្កាឈូក និងស្រាបៀរសិប្បកម្មផ្កាឈូក។ រៀងរាល់ល្ងាច កម្មវិធីពិសេស «Sunset Monk Festival Edition» នឹងរួមបញ្ចូលគ្នានូវដំណើរកម្សាន្តមានមគ្គុទ្ទេសក៍ ការជិះទូកមើលថ្ងៃលិច សិក្ខាសាលា អាហារពេលល្ងាច និងការសម្តែងរបាំអប្សរា (តម្រូវឱ្យមានការកក់ទុកជាមុន)។

លោក Delaval បានមានប្រសាសន៍ថា៖ “មហោស្រពនេះ គឺជាមធ្យោបាយរបស់យើងក្នុងការបង្ហាញថា បេតិកភណ្ឌខ្មែរនៅតែមានជីវិតរស់រវើក ពោរពេញដោយភាពច្នៃប្រឌិត និងបើកចំហទូរទាំងពិភពលោក”។

ពីសារព័ត៌មាន The Khmer Today

មហោស្រពផ្កាឈូក (Festival Lotus) នៅកសិដ្ឋាន Lotus Silk Farm ផ្លូវលេខ ៦៣ ខេត្តសៀមរាប។

មានសេវារថយន្តដឹកជញ្ជូនឥតគិតថ្លៃពី Maison Lotus ផ្លូវលេខ ៣៦ (វិថីពិទូ / Pithnou Street)។

កម្មវិធីលម្អិត និងការកក់ទុក៖ lotussilkfarm.com