លោក ថាក់ស៊ីន ស៊ីណាវ៉ាត់ត្រា អតីតនាយករដ្ឋមន្ត្រីថៃ ត្រូវបានដោះលែងចេញពីពន្ធនាគារកណ្តាល នៅថ្ងៃទី ១១ ខែឧសភា ឆ្នាំ២០២៦នេះ

លោក ថាក់ស៊ីន ស៊ីណាវ៉ាត់ត្រា អតីតនាយករដ្ឋមន្ត្រីថៃ ត្រូវបានដោះលែងចេញពីពន្ធនាគារកណ្តាល នៅថ្ងៃទី ១១ ខែឧសភា ឆ្នាំ២០២៦នេះ

(បាងកក)៖ នៅព្រឹកថ្ងៃចន្ទ ទី១១ ខែឧសភា ឆ្នាំ២០២៦ វេលាម៉ោង ៧:៣៩ ព្រឹក អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ត្រា (Thaksin Shinawatra) បានបង្ហាញខ្លួនជាសាធារណៈជាលើកដំបូងនៅមុខច្រកទ្វារពន្ធនាគារកណ្ដាល Klong Prem បន្ទាប់ពីទទួលបានការដោះលែងឱ្យនៅក្រៅឃុំជាបណ្តោះអាសន្ន (Parole)។

ក្នុងសម្លៀកបំពាក់សាមញ្ញ និងទឹកមុខស្រស់ស្រាយ លោក ថាក់ស៊ីន បានលើកដៃសំពះ និងគ្រវីដៃស្វាគមន៍យ៉ាងកក់ក្តៅទៅកាន់ថ្នាក់ដឹកនាំគណបក្សភឿថៃ ក្រុមគ្រួសារ និងក្រុមអ្នកគាំទ្រអាវក្រហមជាច្រើនរយនាក់ ដែលបានមកជួបជុំគ្នាស្រែកហៅឈ្មោះលោកលាន់ឮពេញបរិវេណពន្ធនាគារ។ មុនពេលឡើងរថយន្តចាកចេញ លោកក៏បានឱបកូនស្រី និងចៅៗរបស់លោកយ៉ាងមានក្ដីសុខបំផុត។

យោងតាមប្រវត្តិករណី លោក ថាក់ស៊ីន ត្រូវបានតុលាការកំពូលកាត់ទោសពាក់ព័ន្ធនឹងបទល្មើសអំពើពុករលួយ និងការរំលោភអំណាចក្នុងអំឡុងពេលកាន់តំណែង រួមមានករណីកម្ចីធនាគារ Exim Bank ទៅឱ្យមីយ៉ាន់ម៉ា, ករណីឆ្នោតឡូតូខុសច្បាប់ និងករណីភាគហ៊ុនក្រុមហ៊ុន Shin Corp។ ទោះបីជាដើមឡើយត្រូវប្រឈមនឹងទោស ៨ ឆ្នាំ ប៉ុន្តែត្រូវបានព្រះមហាក្សត្រថៃព្រះរាជទានបន្ធូរបន្ថយទោសមកត្រឹម ១ ឆ្នាំ កាលពីចុងឆ្នាំ២០២៣។

បើគិតចាប់តាំងពីថ្ងៃដែលលោកបានធ្វើមាតុភូមិនិវត្តន៍ មកកាន់ប្រទេសថៃវិញ កាលពីថ្ងៃទី២២ ខែសីហា ឆ្នាំ២០២៣ រហូតមកដល់ថ្ងៃដោះលែងនាព្រឹកនេះ លោក ថាក់ស៊ីន បានអនុវត្តទោសសរុបចំនួន ៩៩៤ ថ្ងៃ (រួមបញ្ចូលទាំងការឃុំខ្លួនក្នុងមន្ទីរពេទ្យនគរបាលក្រោមហេតុផលសុខភាព)។

បន្ទាប់ពីការបង្ហាញខ្លួននេះ លោកបានធ្វើដំណើរតាមរថយន្តផ្ទាល់ខ្លួនទៅកាន់គេហដ្ឋាន Chan Song La ភ្លាមៗ ដើម្បីបន្តអនុវត្តតាមលក្ខខណ្ឌត្រួតពិនិត្យរបស់អគ្គនាយកដ្ឋានពន្ធនាគារ រហូតដល់ផុតទោសជាស្ថាពរ។ ខណៈបណ្ដោយផ្លូវធ្វើដំណើរទៅកាន់គេហដ្ឋានរបស់លោក ត្រូវបានគេសង្កេតឃើញថា មានការដាក់ពង្រាយកម្លាំងសមត្ថកិច្ច ដើម្បីការពារសន្តិសុខយ៉ាងតឹងរឹងបំផុត។

ប្រភព៖ https://www.facebook.com/share/1CusJ15HVo/?mibextid=wwXIfr

រាយការណ៍ដោយ ៖ The Khmer Today